Dogana e Kosovës ka njoftuar se gjatë kontrolleve të rregullta në pikëkalimin kufitar në Vërmicë, zyrtarët doganorë kanë ndaluar për kontroll një automjet të transportit të udhëtarëve, tek i cili kanë gjetur në posedim produkte farmaceutike të padeklaruara, saktësisht fillerë për botoks.
“Pavarësisht deklaratës së shoferit se nuk posedonte mallra për deklarim, gjatë kontrollit të detajuar është zbuluar një çantë shpine e mbushur me produkte farmaceutike, më saktësisht fillerë për botoks, për të cilat pala nuk posedonte faturë apo dokumentacion përkatës”, ka bërë të ditur Dogana.
Mallrat në fjalë janë ndaluar përkohësisht nga Dogana e Kosovës, deri në përfundimin e procedurave të mëtejshme.
Ndërsa, bëhet e ditur se ndaj palës është inicuar procedurë për kundërvajtje, në përputhje me legjislacionin në fuqi.
“Dogana e Kosovës mbetet e përkushtuar në parandalimin dhe luftimin e kontrabandës, me qëllim të mbrojtjes së tregut vendor dhe shëndetit të qytetarëve të Republikës së Kosovës”, thuhet në njoftimin e Doganës së Kosovës.
