Përfaqësuesit e Bordit dhe të menaxhmentit të RTK-së zhvilluan të mërkurën një takim me kryetarin e Kuvendit të Kosovës, Dimal Basha, me të cilin diskutuan për funksionimin e transmetuesit publik, për shkak të mosfunksionalizimit të plotë të themeluesit të saj – Kuvendit të Kosovës.
Në takim morën pjesë nënkryetari i Bordit të RTK-së, Dardan Beqiri, ushtruesi i detyrës së drejtorit të përgjithshëm, Hysen Hundozi, dhe udhëheqësja e Zyrës Ligjore, Zana Spahiu, të cilët e njoftuan kryetarin Basha për situatën e ndjeshme financiare dhe operacionale të RTK-së.
Ata theksuan mungesën e zgjidhjeve urgjente për disa çështje kyçe, përfshirë transferimin e mjeteve financiare të parapara për RTK-në, “i cili krijon rrezik real për funksionimin e pandërprerë të transmetuesit publik”.
Sipas njoftimit për media, kryetari Basha shprehu mirëkuptim për sfidat me të cilat po përballet RTK-ja dhe siguroi mbështetjen e tij për tejkalimin e situatës aktuale. Ai theksoi rëndësinë e ruajtjes së stabilitetit të transmetuesit publik si institucion me interes të përgjithshëm dhe kombëtar.
Menaxhmenti i RTK-së vlerësoi mirëkuptimin dhe gatishmërinë e kryetarit të Kuvendit për të ndihmuar në gjetjen e një zgjidhjeje të shpejtë.
“Duke pasur parasysh se për këtë është i domosdoshëm bashkëpunimi i të gjitha subjekteve parlamentare, u bëjmë thirrje të gjitha forcave politike që, përtej dallimeve partiake, të kontribuojnë në tejkalimin e sfidave me të cilat po përballet transmetuesi publik, në mënyrë që ai të vazhdojë ta përmbushë misionin e vet në shërbim të qytetarëve dhe interesit të përgjithshëm”, thuhet në deklaratën e RTK-së.
