Pas suksesit të madh në Prishtinë, Baleti Kombëtar i Kosovës do të prezantohet me kantatën skenike “Carmina Burana” në dy qytete të Italisë.
Më 29 nëntor, trupa e Baletit Kombëtar do të ngjitet në skenën e festivalit prestigjioz “VeneziainDanza” në Venecia, ndërsa më 1 dhjetor do të performojë në qytetin e Potenzës.
“’Carmina Burana’, me koreografi nga Toni Candeloro, është një nga projektet më ambicioze të Baletit Kombëtar të Kosovës. Vepra është realizuar në bashkëpunim me Filharmoninë e Kosovës dhe Operën e Kosovës, duke bashkuar fuqinë e muzikës korale me ekspresivitetin e vallëzimit modern. Premiera e kësaj vepre madhështore u dha në qershor të këtij viti në Prishtinë, ku u prit me entuziazëm të madh nga publiku dhe kritika”, thuhet në njoftimin e BKK-së.
Pjesëmarrja në Venecia dhe Potenza përfaqëson një tjetër hap të rëndësishëm në promovimin ndërkombëtar të artit skenik kosovar.
