Prokuroria Speciale e Kosovës ka konfirmuar se po heton rastin e therjes me mjete të mprehta të një zyrtari të Zyrës së Bashkimit Evropian. Rasti ka ndodhur në Gjakovë.
Lajmin për RTKlive e ka konfirmuar zëdhënësja e Prokurorisë Speciale, Arbnora Luta.
Ajo ka bërë të ditur se në koordinim me njësitë relevante të Policisë së Kosovës, po ndërmerren të gjitha masat e nevojshme për të zbardhur plotësisht gjendjen faktike.
“Prokuroria Speciale ju njofton se nga momenti kur e ka pranuar rastin në trajtim, ka filluar me ndërmarrjen e veprimeve hetimore në përputhje me Kodin e Procedurës Penale dhe ligjet në fuqi. Në koordinim me njësitë relevante të Policisë së Kosovës, Prokuroria Speciale është duke ndërmarrë të gjitha masat e nevojshme hetimore me qëllim të zbardhjes së plotë të gjendjes faktike. Duke theksuar se rasti është në fazën fillestare të hetimeve, me qëllim të ruajtjes së integritetit të procesit hetimor, në këtë fazë nuk mund të ndajmë më shumë informacione”, ka deklaruar Luta.
Ndërkohë, zëdhënësi i zyrës së BE-së në Kosovë, Nikola Gaon, ka deklaruar për REL se janë “të tronditur nga lajmi dhe se për shkak se hetimi po vazhdon, aktualisht nuk janë në gjendje të ofrojnë detaje të tjera për këtë rast”.
Në raportin 24 orësh të Policisë së Kosovës, rasti është cilësuar si vrasje në tentativë.
“Viktima mashkull shtetas i huaj ka kërkuar ndihmë mjekësore në QKMF Gjakovë, pasi që i njëjti kishte dy plagë të cilat dyshohet se janë shkaktuar nga një mjet i mprehtë. Viktima me udhëzim të mjekut kujdestar është dërguar në QKUK. Rasti është duke u hetuar”, thuhet në raport.
