Pas përfundimit të fushatës sensibilizuese që ka filluar më 06.10.2025, e cila ka pasur si moto “Një sekond në telefon mund të bëhet shumë vonë. Duart në timon, e jo në telefon”, si dhe pas ligjëratave të mbajtura në shkolla dhe takimeve me qytetarët, Policia Rajonale e Ferizajt ka zbatuar masa represive ndaj shoferëve që janë kapur duke përdorur telefonin gjatë ngasjes së automjetit.
Përmes aktiviteteve të zhvilluara gjatë periudhës sensibilizuese, janë mbajtur ligjërata në shkolla, janë zhvilluar takime me qytetarët, dhe janë shpërndarë fletëpalosje informuese me mesazhe vetëdijesuese për rreziqet që sjell përdorimi i telefonit gjatë ngasjes. Qëllimi i këtyre aktiviteteve ka qenë rritja e ndërgjegjësimit dhe parandalimi i aksidenteve në trafik.
Si rezultat i veprimeve të Policia Rajonale të Ferizajt, gjatë muajit tetor 2025 janë shqiptuar gjithsej 329 gjoba ndaj shoferëve që kanë shkelur këtë rregull, duke rrezikuar sigurinë e tyre dhe të pjesëmarrësve të tjerë në komunikacion.
“Përdorimi i telefonit gjatë ngasjes mbetet një nga shkaqet kryesore të aksidenteve rrugore. Prandaj, Policia Rajonale e Ferizajt apelon tek të gjithë pjesëmarrësit në trafik që të përqendrohen plotësisht në drejtimin e automjetit dhe të shmangin çdo shpërqendrim, pasi edhe një sekond pakujdesie mund të ketë pasoja fatale”, thuhet në njoftim.
Tutje thuhet se kontrollet dhe masat ndëshkuese do të vazhdojnë edhe në ditët në vijim në të gjitha rrugët e rajonit të Ferizajt, me qëllim mbrojtjen e jetës së qytetarëve.
Policia Rajonale e Ferizajt ka ftuar qytetarët që të bashkëpunojnë dhe të raportojnë çdo shkelje në trafik.
