Një zyrtar i Shtëpisë së Bardhë, i cili nuk është bërë i ditur, i konfirmoi BBC-së se Presidenti i SHBA-së, Donald Trump, ka vendosur që vendi i tij ta përjashtojë Hungarinë nga sanksionet për blerjen e naftës dhe gazit rus për një vit.
Trump tha më parë se do të shqyrtonte përjashtimin e Hungarisë nga sanksionet, të cilat Trump pretendon se po përpiqet t’i përdorë për t’i dhënë fund agresionit të Rusisë kundër Ukrainës. Gjatë takimit të djeshëm me kryeministrin hungarez Viktor Orbán në Shtëpinë e Bardhë, ai deklaroi se është shumë e vështirë për Hungarinë të sigurojë naftë dhe gaz nga zona të tjera.
Pas këtij takimi, Ministri i Jashtëm hungarez Peter Szijjarto shkroi në rrjetin social X se Shtetet e Bashkuara të Amerikës i kishin dhënë vendit të tij “përjashtim të plotë dhe të pakufizuar nga sanksionet”.
Kjo ndodhi pasi SHBA-të muajin e kaluar vendosën sanksione ndaj dy kompanive më të mëdha ruse të naftës dhe kërcënuan me sanksione kundër atyre që do të blejnë naftë ruse. Përjashtimi i Hungarisë nga sanksionet konsiderohet një fitore e madhe për Orbán-in. Ai më parë deklaroi se sanksionet mund të shkatërrojnë ekonominë hungareze, shkruan BBC .
