Kryeministri në detyrë, Albin Kurti, njëherësh kryetar i VV-së, ka votuar në objektin e Fakultetit Juridik në Prishtinë, ku ka ftuar të gjithë qytetarët që të shfrytëzojnë të drejtën për të votuar.
Kurti ka deklaruar se gjatë fushatës zgjedhore ka punuar intensivisht, duke ndjekur nga afër përgatitjet për procesin e sotëm zgjedhor.
“Gjatë kësaj fushate unë kam punuar në tri ndërrime anë e mbanë Komunave të Kosovës. Jam përpjekur të vëzhgoj të gjitha përgatitjet për zgjedhje. Zgjedhjet komunale janë jo më pak të rëndësishme sesa ato parlamentare e qendrore. Tejet e rëndësishme për mirëqenien e dinjitetin, dhe cilësinë e jetesës së qytetarëve. Fletëvotimi ishte i thjeshtë i kishte vetëm dy emra. Njëri prej tyre medeomos do të fitojë në mbrëmje”, deklaroi Kurti para mediave.
Ai ka ftuar të gjithë qytetarët që të shfrytëzojnë të drejtën për të votuar. Kurti tha se 18 komunat që sot votojnë përbëjnë 80% të qytetarëve të Kosovës.
“Është ditë e mirë për demokracinë dhe vullnetin e lirë. Republika e Kosovës mban zgjedhjet në raundin e dytë për balotazh në 18 komuna të shtetit tonë. Unë posa votova këtu në Prishtinë, në ndërtesën e Fakultetit Juridik. U bëj thirrje gjithë qytetarëve me të drejtë vote që të shfrytëzojnë rastin dhe të bëhen pjesëmarrës e vendimmarrës për kryetarët e komunave, dhe kësisoj për katërvjeçarin në vijim përa ta si banorë të komunave të Republikës. Gjithçka do të shkojë mbarë e mirë, dhe Komisioni Qendror i Zgjedhjeve ka bërë përgatitjet, ndërsa të gjithë komisionerët e vëzhguesit tashmë ndodhen në qendrat e votimit,” shtoi ai.
