Sindikata e Punëtorëve të RTK-së (SPERTK) ka zhvilluar sot një tjetër protestë para objektit të Radiotelevizionit të Kosovës, përmes së cilës ka njoftuar se të hënën do të mbahet një grevë njëorëshe në të gjitha njësitë e RTK-së.
Në protestë morën pjesë edhe Asociacioni i Gazetarëve të Kosovës (AGK), Bashkimi i Sindikatave të Pavarura të Kosovës (BSPK), Sindikata e Bashkuar e Arsimit, Shkencës dhe Kulturës (SBASHK) të cilët shprehën mbështetjen e tyre për kërkesat e punëtorëve të RTK-së.
Kryetari i SPERTK-së, Gazmend Bimbashi, në fjalimin e tij gjatë protestës, tha se gjendja në RTK është përkeqësuar ndjeshëm, ndërsa institucionet përgjegjëse vazhdojnë të heshtin përballë situatës së rëndë ekonomike të punëtorëve.
“Mbi 700 familje të punonjësve të RTK-së po përballen çdo ditë me probleme për mbijetesë. Presione nga bankat, vështirësi për të paguar faturat e energjisë dhe ankth i përditshëm për të ardhmen. Kjo nuk është më thjesht krizë ekonomike, është krizë dinjiteti,” deklaroi Bimbashi.
Ai theksoi se zgjidhja e kësaj situate mund të bëhet menjëherë me një vendim të vetëm të kryeministrit të Kosovës në detyrë, Albin Kurti, duke kërkuar ndërhyrje të menjëhershme.“Mos i fusni punëtorët e RTK-së në beteja politike. Ne nuk jemi pjesë e asnjë partie, jemi punëtorë që kërkojmë atë që na takon me ligj,” shtoi ai.
Sipas kryetarit të SPERTK-së, nëse deri të hënën nuk jepen garanci për pagat, sindikata do të dalë me qëndrim zyrtar për bojkotimin e të gjitha ngjarjeve me karakter politik.
“RTK është pronë publike, është e qytetarëve të Kosovës, jo e partive politike. Ne do ta mbrojmë me dinjitet, unitet dhe vendosmëri,” tha Bimbashi. Ai theksoi se greva e paralajmëruar do të mbahet të hënën nga ora 11:00 deri në 12:00, ndërsa mund të zgjerohet me orë të tjera nëse kërkesat e sindikatës nuk plotësohen.
Sindikata u bëri thirrje të gjithë punëtorëve të RTK-së që të qëndrojnë të bashkuar dhe të respektojnë vendimin për grevë.
Kryetari i Bashkimit të Sindikatave të Pavarura të Kosovës (BSPK), Atdhe Hykolli, ka bërë thirrje kryeministrit në detyrë, Albin Kurti, që të ndajë buxhetin e RTK-së. Ai tha se BSPK është me punëtorët e RTK-së, pasi punëtorët e RTK-së po kërkojnë pagën e tyre.
Ndërsa Xhemajl Rexha, kryetar i AGK-së, ka kërkuar që urgjentisht qeveria në detyrë të veprojë njëjtë si disa muaj më parë dhe të ndahet buxheti edhe për tre muaj. Sipas tij, është e papranueshme që në këtë mënyrë të bëhet presion. Ai ka thënë se e përkrah edhe grevën e paralajmëruar, pasi ajo është një nga format e protestës.
Kryetari i Sindikatës së Bashkuar të Arsimit, Shkencës dhe Kulturës (SBASHK), Rrahman Jasharaj, tha se SBASHK-u është me punëtorët e RTK-së dhe se do të jenë në krah të tyre. Ai tha se, ashtu siç janë gjetur mjete për studentët, po ashtu duhet të ndahet edhe buxheti që i takon RTK-së.
