Derisa edhe në ditën e trembëdhjetë të nëntorit, punëtorët e RTK-së ende nuk i kanë marrë pagat e muajit tetor, nga Lidhja Demokratike e Kosovës thonë se përgjegjësia kryesore bie mbi qeverinë e kryeministrin në detyrë.
Deputeti i LDK-së, Alban Zogaj, thotë se po shfrytëzohet RTK-ja e agjencitë tjera, për të bërë presion, sipas tij, edhe ndaj publikut edhe ndaj partive politike.
Zogaj tha se bashkndien me punëtorët e RTK-së që nuk po i marrin pagat, por tha se zgjidhja mund të bëhet nga qeveria.
“Përgjegjësia kryesore bie mbi atë që thotë vazhdimisht ‘ka qeveri, Kuvend nuk ka se qeveri ka’, nëse ka qeveri bëjeni zgjidhjen ju lutem, por jo vetëm për RTK-në, por edhe për agjencionet tjera të pavarura që janë në krizë buxhetore. Studentëve iu dha shtesat, bonuset e bursat, edhe të tjerëve. Ka mundësi të bëjë zgjidhje, por po shfrytëzohet RTK e agjencionet tjera, për të bërë presion edhe ndaj publikut edhe ndaj partive politike. Është krejtësisht e padrejtë, jo korrekte dhe jo morale. Përgjegjësia e plotë bie mbi kryeministrin në detyrë”, tha Zogaj.
Ndërkohë, Berat Rukiqi nga kjo parti deklaroi se mungesa e shumicës ka prodhuar çdo problem tjetër përfshirë dhe Komisionet Parlamentare.
Sipas tij, sot në Kosovë nuk ka pozitë e as opozitë, e rrjedhimisht nuk ka as Komisione Parlamentare që siç tha ai, i takojnë pozitës e opozitës.
