Presidentja e Kosovës, Vjosa Osmani, ka bërë të ditur se ka caktuar 28 dhjetorin si datë për zgjedhjet e jashtëzakonshme. Ajo ka theksuar se kjo datë është më e përshtatshmja për mbajtjen e zgjedhjeve.
“21 dhe 28 dhjetor janë datat që mund të bëhen sipas Kushtetutës. Tetë parti janë deklaruara për datën 28, pesë parti për datën 21 dhe 3 parti për cilëndo datë. 28 dhjetorin e kam vlerësuar që mbetet data e vetme e mundshme, edhe pse edhe kjo datë do të ketë sfida për KQZ-në”, tha ajo.
Ajo ka përmendur pse data 21 dhjetor praktikisht është e pamundshme për mbajtjen e zgjedhjeve si dhe ka treguar pse 4 e 11 janari nuk mund të jenë data për mbajtjen e zgjedhjeve.
Tha se 11 janari është datë jashtë afateve kushtetuese, meqë sot ka shpërndarë me dekret Kuvendin.
Për 4 janarin tha se do të ishte problem shfrytëzimi i buxhetit për KQZ-në për organizimin e zgjedhjeve.
“Sa i përket 4 janarit, jam njoftuar se sa i përket legjislacionit në fuqi dhe meqë nuk kemi buxhet të miratuar për vitin e ardhshëm, KQZ-së i lejohet të përdorë vetëm një të dymbëdhjetën e buxhetit, maksimum 1. 5 milion. Praktikisht nuk është e mundur zgjedhjet të mbahen në këtë datë për shkak të pamundësisë të shfrytëzohet buxheti”, tha ajo.
Tutje, Osmani në konferencën për media ka folur pse data 28 dhjetor është më e pranueshme si datë zgjedhjesh.
Ka treguar se gjatë kësaj periudhe ka qenë në kontakt të vazhdueshëm me kreun e KQZ-së me të cilin tha se biseduan për procesin e papërfunduar të zgjedhjeve lokale e atë që pritet të ndodhë në Kosovë.
“Gjatë kësaj periudhe kam qenë në kontakt me kryetarin e KQZ-së, duke analizuar procesin e papërfunduar të zgjedhjeve lokale të cilat nuk kanë përfunduar akoma sa i përket procedurës së certifikimit. Ekzistojnë pastaj afatet e ankesave, pas kësaj procedurat e asgjësimit të materialit, përgatitja e platformës së rezultateve preliminare dhe asaj të numërimit që duhet të ripërtrihen në parametrat e zgjedhjeve të përgjithshme. Para fillimit të fushatës janë edhe një sërë veprimesh që janë regjistrimi i subjekteve politike e koalicioneve, dhe certifikimi i kandidatëve, hedhja e shortit, shpallja e fletëvotimit e veprime të tjera. Për më tepër duhet së paku hapësirë kohore për të mundësuar votimin jashtë vendit dhe duhet pasur parasysh që sipas Ligjit të ri për Zgjedhjet e Përgjithshme, shtetasve që jetojnë jashtë vendit duhet dhënë së paku 15 ditë afat me qëllim të aplikimit dhe regjistrimit për të votuar. Në mesin e gjithë këtyre janë edhe procedurat tenderuese. Pra të gjitha këto e bëjnë praktikisht të pamundshme edhe datën 21 dhjetor”, tha ajo.
Osmani tregoi se para se të nënshkruante dekretin për shpërndarje, sot ka bërë përpjekjen e fundit që partitë parlamentare të kthehen edhe njëherë në Kuvend.
“Para se ta nënshkruajë dekretin për shpërndarje kam bërë përpjekjen e fundit që partitë të kthehen në Kuvend që të miratohen zgjatjet buxhetore në mënyrë që as pagat e qytetarëve tanë e as funksionimi i shtetit të mos bllokohen dhe të kemi buxhet deri në mars. Së dyti ka qenë edhe pako presidenciale prej pesë marrëveshjesh ndërkombëtare në vlerë prej 1 miliardë euro dhe çështje të tjera të rëndësishme për të cilat kam shpresuar për vullnet politik”, ka thënë Osmani.
Megjithatë, ajo ka thënë se ka pasur mungesë të vullnetit politik për këtë dhe si rrjedhojë është detyruar të nënshkruajë dekretin e shpërndarjes së legjislaturës së nëntë të Kuvendit.
