Kryetari i Lidhjes Demokratike të Kosovës, Lumir Abdixhiku, ka reaguar përmes një deklarate të publikuar në rrjetet sociale, duke dhënë versionin e tij lidhur me diskutimet e zhvilluara rreth mundësisë së votimit të një pakoje të përbashkët ligjesh, përpara shpërndarjes së Kuvendit.
Abdixhiku tha se mbrëmjen e nominimit të Glauk Konjufcës si mandatar, i kishte shprehur Presidentes së vendit gatishmërinë e LDK-së që të mbështeste një pako të përbashkët – të cilën ai tha se mund të quhej edhe “Pakoja e Presidentes”. Sipas tij, pakoja do të përfshinte zgjatjen e buxhetit për tre muaj, votimin e ligjeve të Prishtinës dhe Gjilanit, sigurimin e pagave për RTK-në, si dhe miratimin e Pakos Evropiane të Rritjes.
Ai theksoi se menjëherë pas mandatimit të Konjufcës, Presidentja e kishte kontaktuar, duke e informuar se kishte komunikuar me Lëvizjen Vetëvendosje dhe se reagimi i tyre ndaj propozimit kishte qenë “shumë pozitiv”.
Kreu i LDK-së deklaroi se në të njëjtën mbrëmje kishte informuar edhe kryetarët e PDK-së, AAK-së dhe Nismës – Memli Krasniqin, Ramush Haradinajn dhe Fatmir Limajn – duke u bërë të ditur se ekzistonte mundësia e mbështetjes së një pakete të tillë për të mirën e vendit. Sipas tij, për këtë çështje kishte njoftuar edhe disa ambasadorë të vendeve të QUINT-it.
“Prej asaj mbrëmjeje nuk ka lëvizur asgjë për 15 ditë,” u shpreh Abdixhiku, duke theksuar se vonesa e pashpjeguar ishte, sipas tij, tregues i një tendence për krijimin e krizës dhe bartjen e fajit politik.
Ai shtoi se propozimi, të cilin e quan të hapur dhe të inicuar prej tij, iu kthye në momentin e caktimit të datës së zgjedhjeve, në të njëjtën kohë kur ishte vendosur stilolapsi mbi dekretin për shpërndarjen e Kuvendit. Abdixhiku tha se edhe në atë takim kishte ritheksuar se, nëse ekzistonte gatishmëri e përgjithshme, LDK nuk ishte kundër.
“Sot habitem me sa lehtësi fshihet ky fakt. E kuptoj betejën politike, por na duhet minimalisht korrektësi dhe sjellje njerëzore,” shkroi ai, duke këmbëngulur se deklarimi i tij është i regjistruar zyrtarisht.
Abdixhiku paralajmëroi se në ditët në vijim do të shpalosen më shumë detaje, duke pretenduar se bllokada institucionale ka qenë e qëllimshme dhe se krizës i janë shtuar 12 muaj të tërë të një situate të inskenuar politikisht.
Në fund, ai u shpreh se pavarësisht sfidave, Kosova “mund të bëhet lehtë” dhe se përgjegjësia bie mbi të gjithë për ta çuar vendin përpara.
