Instituti Hidrometeorologjik i Kosovës njofton se nga sot deri të shtunën pritet depërtimi i një mase të ftohtë ajrore me origjinë veriore, e cila do të sjellë një stabilizim të temperaturave në nivele më të ulëta dhe do të krijojë kushte për mot të vranët dhe me reshje.
Në zonat malore, parashikohen reshje të vazhdueshme bore, ndërsa në ultësira reshjet fillimisht do të paraqiten në formë të rigave të dobëta shiu, të cilat me rënien progresive të temperaturave do të kalojnë gradualisht në reshje bore.
Instituti Hidrometeorologjik i Kosovës thotë se si pasojë, edhe në disa zona të ultësirave priten intervale të shkurtra me reshje bore, kryesisht gjatë orëve të pasdites dhe mbrëmjes së së enjtes dhe të premtes, në varësi të intensitetit të masës së ftohtë dhe profilit termik të shtresës së ulët të atmosferës.
