Presidentja e vendit, Vjosa Osmani, e ka cilësuar ditë krenarie Ditën e Forcës së Sigurisë së Kosovës, duke e quajtur këtë institucion pasardhëse të UÇK-së.
“Ushtria jonë çdo ditë po përforcohet dhe po bëhet më operacionale, ndërvepruese e profesionale…Jemi jashtëzakonisht krenar me punën e tyre. Ata janë garanca më e fuqishme së bashku me Policinë e Kosovës dhe institucionet e tjera të sigurisë për sovranitetin tonë, integritetin territorial e mbrojtjen shtetërore e të çdo qytetari tonë”, ka thënë Osmani.
Kurti përmend investimet në FSK: E pajisur me teknologji moderne
Kryeministri në detyrë, Albin Kurti ka përmendur investimin prej mbi 430 milionë eurove në pajisje e armatim për FSK-në gjatë katër viteve të fundit.
Ai ka thënë se ky institucion më herët ka qenë e pajisur më dobët se Policia e Kosovës. “Ndërkaq tani është e pajisur me teknologjike moderne e kjo sa vije e shtohet, tashmë kemi më shumë se dyfishim të çizmeve në tokë por gjithashtu të syve në qiell, kjo për shkak se kemi pajisur FSK-në me dronë ‘Sky Tech’ dhe ‘TB2 Bayraktar’ nga Turqia, ‘Puma’ nga SHBA dhe së shpejti do ta kemi edhe fabrikën e municionet dhe prodhimin e dronëve të prodhuara nga Kosova”, ka thënë ai.
“Me FSK-në, këtë ushtri të pajisur kaq mirë, brezat e rinj do të jenë të sigurtë të jetojnë në paqe dhe të lulëzojnë. Në njërën anë kemi sakrificën e dëshmorëve të kombit, mbi të gjitha atë të Adem Jasharit dhe familjes së tij, veteranët e invalidët e UÇK-së e në anën tjetër i kemi të gjithë këta fëmijë që kanë ardhur të shohin ushtrinë e tyre”, ka thënë ai.
Basha: FSK, institucioni më i besueshëm në vend
Kryetari i Kuvendit, Dimal Basha ka thënë se trashëgimia që mbart në veti FSK buron nga UÇK.
“FSK mbetet institucioni më i besueshëm në vend dhe kjo për shkak të një pune të shkëlqyer dhe përkushtimit të tyre për sigurinë në vendin tonë”, ka thënë ai.
Osmani, Basha dhe Kurti vizitojnë kazermën e FSK-së në ‘Ditën e Forcës’
Presidentja Vjosa Osmani, kryetari i Kuvendit, Dimal Basha dhe kryeministri në detyrë, Albn Kurti janë duke vizituar nga afër kazermën kryesore të Forcës së Sigurisë së Kosovës, “Adem Jashari”, me rastin e “Ditës së Forcës”.
Ata bashkë me ministrin në detyrë të Mbrojtjes, Ejup Maqedonci po shohin artilerinë dhe mjetet e ushtrisë së Kosovës.
Përveç figurave të rëndësishme publike, dhjetëra qytetarë sot do të kenë mundësinë që të njihen me kapacitetet e FSK-së duke vizituar kazermat në Prishtinë, Prizren, Pomozotin, Istog, Ferizaj, Mitrovicë dhe Gjilan.
“Dita e Forcës” do të shënohet deri në orën 14:00.
