Presidenti polak Karol Nawrocki ka anuluar një takim me kryeministrin hungarez Viktor Orbán që ishte planifikuar për sot, duke përmendur vizitën e fundit të Orbán në Moskë, ku ai diskutoi lidhjet energjetike me Rusinë. Edhe pse Nawrocki udhëton për në Hungari të mërkurën, vizita e tij do të kufizohet vetëm në një takim të presidentëve të Grupit të Vishegradit, raporton Euronews .
Një mesazh i fortë nga Varshava
Vendimi u konfirmua në rrjetin social X nga Marcin Przydacz, kreu i Zyrës për Politikë Ndërkombëtare në Zyrën e Presidentit polak. “Presidenti K. Nawrocki vendosi ta kufizojë programin e vizitës së tij në Hungari ekskluzivisht në samitin e presidentëve të Grupit të Vishegradit në Ostrzyhom”, shkroi Przydacz.
Deklarata zyrtare shpjegoi se politika e Polonisë bazohet në trashëgiminë e Presidentit Lech Kaczyński, i cili theksoi se siguria e Evropës varet nga solidariteti, përfshirë edhe në fushën e energjisë.
Orbán këmbëngul në burimet ruse të energjisë
Nga ana tjetër, kryeministri hungarez tha pas vizitës së tij në Moskë se kishte siguruar garanci për furnizime afatgjata me energji nga Rusia. “Energjia ruse përbën bazën e furnizimit me energji të Hungarisë, tani dhe në të ardhmen”, tha Orbán.
Hungarisë i është dhënë një përjashtim i pacaktuar nga sanksionet e SHBA-së për përdorimin e naftës dhe gazit rus, nga të cilët varet shumë, në kundërshtim me politikën e Bashkimit Evropian për ndërprerjen e plotë të importeve deri në vitin 2027. Budapesti këmbëngul se importimi i energjisë ruse është thelbësor për mbijetesën e ekonomisë së saj, dhe Orbán ka argumentuar vazhdimisht se kalimi në burime alternative do të shkaktonte një kolaps të menjëhershëm ekonomik.
Reagime të ndara
Gjatë një takimi në Kremlin, Presidenti rus Vladimir Putin vlerësoi “qëndrimin e ekuilibruar” të Orbán-it ndaj luftës në Ukrainë.
Takimi i planifikuar fillimisht midis Nawrocki-t dhe Orbán-it u kritikua nga kryeministri polak Donald Tusk të premten. “Orbán viziton Putinin, Nawrocki viziton Orbán-in. Kaos në negociatat mbi planin Witkoff dhe një krizë politike në Kiev”, shkroi Tusk për Xu-në, duke përfunduar: “Një kombinim fatal”.
