Janë bërë më shumë se tri vjet qëkur pozita kyçe në sistemin prokurorial të Kosovës funksionon me ushtrues të detyrës, pas përfundimit të mandatit nga kryeprokurori i shtetit, Aleksandër Lumezi.
Ndonëse për këtë pozitë u hap konkurs dhe Blerim Isufaj mori pikët maksimale, ai nuk u dekretua nga presidentja e vendit, por në këtë post u emërua ushtrues detyre Besim Kelmendi.
E zhvillimet e fundit në Këshillin Prokurorial të Kosovës, ku anëtarët janë ndarë në dy grupe, një në mbështetje të Kelmendit dhe një tjetër që në një mbledhje shkarkoi Kelmendin nga kjo pozitë, janë pasojë e mungesës së një kryeprokurori me mandat të rregullt, thonë nga shoqëria civile.
Ehat Mifataraj nga Instituti i Kosovës për Drejtësi thotë se vazhdimisht kanë kërkuar nga Këshilli Prokurorial që t`i marrë parasysh rekomandimet e ndërkombëtarëve dhe të shoqërisë civile që të shpallë konkursin për kryeprokurorin, por që ka mungesë të vullnetit politik për këtë.
“Është dallim i madh që këshilli prokurorial të ketë kryeprokuror me mandat 7 vjeçar me një ushtrues të detyrës sepse e pamë në javët e fundit se si ushtruesi i detyrës në mënyrë të kundërligjshme dhe me sa lehtësi Këshilli prokurorial e shkarkoi dhe e emëroi një tjetër edhe pa pasur kuorum, përderisa një kryeprokuror me mandat 7 vjeçar sigurisht që ka garanca kushtetuese, juridike shumë më të mëdha, emërimi i të njëjtit bëhet nga presidenti pas propozimit nga KPK , e kjo e dëshmon në njëfarë mënyre pse Kosova ka nevojë për një kryeprokuror me mandat të plotë e jo një ushtrues detyre që 3 vite e më shumë”, tha ai.
Ngjashëm mendon edhe Vullnet Bugaqku nga Instituti Demokratik i Kosovës, sipas të cilit, procedurat e dekretimit të kryeprokurorit janë vonuar pasi nuk ka afat kohor që e cakton presidenten të marrë një vendim të tillë.
E ajo që u pa në Këshillin prokurorial këto ditë, sipas tij, ka dëmtuar imazhin dhe integritetin e këtij institucioni.
“Jemi sot ku jemi 3 vite apo 4 vite pas propozimit të KPK nuk kemi ende një kryeprokuror të shtetit, rrjedhimisht kjo është për shkaqe që opinionet e komisonit të Venecias po edhe shumë vendime të gjykatave të ndryshme kushtetuese ku e afektojnë pavarësinë e sistemit prokurorial nga mungesa e dekretimit të një kryeprokurori të shtetit, mirëpo tani siutata është e agravuar në kuptimin e përbërjes së tanishme dhe si duket në këshill ka probleme edhe ka tabore të ndryshme sa i përket ecurisë së mëtutjeshme”, deklaroi ai.
RTK ka kërkuar një qëndrim nga Këshilli Prokurorial se a planifikojnë që të shpallin konkurs për zgjedhjen e kryeprokurorit të ri të shtetit, por që gjatë ditës nuk kanë kthyer përgjigje.
