Biseda midis Presidentit rus Vladimir Putin dhe Steven Witkoff, të dërguarit të posaçëm të Presidentit të SHBA-së Donald Trump, ka vazhduar për gati tre orë.
Ende nuk ka shenja se takimi do të përfundojë, raporton agjencia shtetërore ruse e lajmeve Tass.
Nga pala ruse në takim marrin pjesë edhe ndihmësi i Putinit, Yuri Ushakov, dhe Përfaqësuesi Special për Investime dhe Bashkëpunim Ekonomik me Vendet e Huaja, Drejtori i Përgjithshëm i Fondit Rus të Investimeve Direkte, Kirill Dmitriev. Nga pala amerikane është i pranishëm edhe dhëndri i Trump, sipërmarrësi, investitori dhe themeluesi i Affinity Partners, Jared Kushner.
Temat e takimit
Takimi, biseda e parë e drejtpërdrejtë e Kushnerit me Putinin, vjen pas dy javësh diplomacie intensive që përfshinte dy raunde bisedimesh midis delegacioneve amerikane dhe ukrainase.
Dy burime, të cituara nga Axios, thanë se Witkoff dhe Kushner pritet të informojnë Presidentin ukrainas Volodymyr Zelensky mbi bisedimet e Kremlinit në Evropë nesër.
Territori është çështja më e ndjeshme
Plani amerikan, fillimisht i përbërë nga 28 pika, është ngushtuar në bisedimet e fundit me Kievin, duke u përqendruar kryesisht në përcaktimin e kufirit de facto si pjesë e një armëpushimi të mundshëm.
Putin më parë tha se propozimi i Trump mund të shërbejë si bazë për negociata, megjithëse ai sinjalizoi një mungesë vullneti për të hequr dorë nga kërkesat e hershme ruse, përfshirë kontrollin e të gjithë rajonit Donbas.
SHBA-të thuhet se i kanë bërë thirrje Ukrainës të lëshojë territor atje për të çuar përpara procesin, një lëshim i përshkruar si politikisht i dhimbshëm për Kievin.
Pak para takimit, Putin e paralajmëroi Evropën se do të përballej me disfatë të shpejtë nëse do të shkonte në luftë me Rusinë dhe i hodhi poshtë kundërpropozimet evropiane për Ukrainën si absolutisht të papranueshme për Rusinë.
Witkoff për Putinin: Moska është një qytet madhështor
Trump ka thënë vazhdimisht se dëshiron t’i japë fund luftës, por përpjekjet e tij deri më tani, përfshirë një samit me Putinin në Alaska në gusht dhe takimet me Presidentin ukrainas Volodymyr Zelensky, ende nuk kanë sjellë paqe.
“Jam shumë i lumtur që ju shoh”, u tha Putin Witkoff dhe Kushner kur u takuan të martën. “Ky është një qytet madhështor”, i tha Witkoff Putinit pasi më parë kishte ecur me Kushner dhe të dërguarin e udhëheqësit rus, Kirill Dmitriev, në Sheshin e Kuq pranë Mauzoleut të Leninit.
Zelenski: Pjesët më të vështira të planit të paqes janë territori, paratë dhe garancitë e sigurisë
Presidenti ukrainas Volodymyr Zelensky tha në Dublin se elementët më sfidues të planit të ri të paqes janë çështja e territorit, përdorimi i aseteve të ngrira ruse në Evropë dhe garancitë e sigurisë. Ai tha se “tani më shumë se kurrë” ekziston një mundësi për t’i dhënë fund luftës, raporton BBC.
Zelensky tha pas takimit me kryeministrin irlandez Michael Martin se kishte folur të hënën me të dërguarin e SHBA-së Steve Witkoff, i cili do të takohet me presidentin rus Vladimir Putin në Moskë të martën. Ukraina, tha ai, është duke pritur rezultatet e atij takimi. “Do të reagoj ndaj këtyre rezultateve, nëse mendoj se mund të mbështetemi në një dialog të vërtetë dhe konkret… do të takohemi”, tha ai.
Presidenti ukrainas theksoi se është “koha e duhur” për të transferuar asetet e ngrira ruse në Ukrainë me qëllim financimin e mbrojtjes dhe rindërtimit, duke shtuar se një veprim i tillë do të ishte i dobishëm edhe për partnerët. Ai theksoi se Ukraina mbështetet në garanci “të forta” sigurie nga SHBA-të dhe Evropa.
Kemi një marrëveshje të re prej 20 pikash me SHBA-në
Zelensky konfirmoi se SHBA-të dhe Ukraina kishin rënë dakord për një marrëveshje të re paqeje prej 20 pikash. Propozimi origjinal prej 28 pikash i SHBA-së u rishikua pas bisedimeve midis zyrtarëve, raporton Independent. “Tani më shumë se kurrë, ekziston një shans për t’i dhënë fund kësaj lufte”, tha Zelensky.
Një burim i lartë ukrainas i tha France Presse se një delegacion ukrainas mund të takohet të mërkurën me të dërguarin amerikan Witkoff dhe dhëndrin e presidentit amerikan, Jared Kushner, pas bisedimeve të tyre në Moskë. Ai shtoi se Ukraina “nuk e përjashton dhe është gati” për takimin.
Ai përmendi mundësinë e mbajtjes së takimit në Bruksel, ku ministrat e jashtëm të NATO-s do të takohen të mërkurën. Sekretari i Shtetit i SHBA-së, Marco Rubio, nuk do të marrë pjesë në atë takim.
