Në Gorica të Madhe( Prefektura e Zagrebit) u mbajtën manifestimet qendrore kushtuar 113-vjetorit të Pavarësisë së Shqipërisë, Ditës së Flamurit dhe festave të fundvitit, organizuar nga Këshilli i Pakicës Kombëtare Shqiptare në Prefekturën e Zagrebit, në bashkëpunim me shoqatat kulturore shqiptare.
Programi përfshiu promovimin e Fjalorit Juridik Kroatisht–Shqip të autores Armenda Amiti, një botim i rëndësishëm që synon forcimin e lidhjeve kulturore dhe arsimore midis dy vendeve.
Kryetari e përgëzoi autoren për punën duke e motivuar që sa më shumë libra të tillë të promovohen në të ardhmen.
Pas pjesës promovuese, aktivitetet vazhduan me një program të pasur kulturore–artistik, ku morën pjesë artistë të njohur nga Kosova dhe Maqedonia e Veriut, si dhe shoqata shqiptare që veprojnë në Kroaci, të cilat sollën këngë, valle dhe prezantime tradicionale shqiptare.
Në fjalimin e tij, Kryetari i Unionit Esad Çollaku theksoi rëndësinë historike të 28 Nëntorit, duke kujtuar sakrificat e mëdha të popullit shqiptar ndër breza. Ai foli gjithashtu për rolin e Ushtrisë Çlirimtare të Kosovës dhe për kontributin e atyre që dhanë jetën për lirinë e vendit, duke theksuar se këto sakrifica nuk duhet të harrohen kurrë.
Kryetari bëri edhe një thirrje të veçantë drejtuar të gjitha familjeve shqiptare në Kroaci që t’i sjellin fëmijët në mësimin plotësues në gjuhën shqipe dhe në aktivitetet kulturore të shoqatave shqiptare si “Shkëndija”, në Karlovac e në Istër.
Ai nënvizoi se ruajtja e gjuhës dhe kulturës është detyrë brezash dhe se pjesëmarrja e fëmijëve në këto aktivitete është themelore për identitetin tonë kombëtar.
Manifestimet u përmbyllën në një atmosferë festive me darkën solemne të organizuar për pjesëmarrësit dhe të ftuarit.
