Kryetari i Nismës Socialdemokrate të Kosovës, Fatmir Limaj, ka konfirmuar sot se partia e tij do të marrë pjesë në zgjedhjet e parakohshme të 28 dhjetorit me një listë prej 110 kandidatësh, duke theksuar se bashkimi politik me PDK-në nuk arriti të finalizohet para zgjedhjeve dhe do të konkretizohet vetëm në Kuvendin e Kosovës.
Kryetari i Nismës Socialdemokrate të Kosovës, Fatmir Limaj, ka konfirmuar sot se partia e tij do të marrë pjesë në zgjedhjet e parakohshme të 28 dhjetorit, me një listë prej 110 kandidatëve për deputetë.
Në një konferencë për media, Limaj tha se përpjekjet për bashkim politik me Partinë Demokratike të Kosovës (PDK) nuk kanë arritur të finalizohen para zgjedhjeve.
“Siç u kam premtuar qindra bashkëpunëtorëve, ne do të përpiqemi deri në sekondat e fundit për të ofruar një mundësi bashkimi që jep shpresë për ndryshime. Fatkeqësisht, ai bashkim që e keni pritur qytetarë, dhe që ne e kemi ofruar pa kushte, nuk ka ndodhur. Shkaku tani më dihet”, deklaroi Limaj.
Ai shtoi se procesi i bashkimit politik do t’i kthehet “nga baza” dhe do të konkretizohet në Kuvendin e Kosovës, përmes bashkimit të grupeve parlamentare, nëse partia e tij e kalon pragun zgjedhor.
Limaj shprehu bindjen se NISMA do të arrijë këtë rezultat në zgjedhjet e 28 dhjetorit dhe theksoi se bashkimi parlamentar me PDK-në është kërkesë e shumicës së qytetarëve dhe e mbështetësve të partisë.
Kryetari i Nismës gjithashtu bëri të ditur se, sipas parashikimeve të partisë, me 15 mijë vota më shumë se sa ka aktualisht, NISMA do të sigurojë 6 deputetë në Parlament.
“Ndryshimi është i nevojshëm. Kryeministri i ardhshëm duhet të jetë nga opozita. Qeverisja ndryshon vetëm nëse NISMA futet në Parlament dhe formohet grupi i madh parlamentar i PDK-së”, tha Limaj.
