Oda Ekonomike e Kosovës (OEK) ka njoftuar sot se ka dorëzuar një kallëzim penal në Prokurorinë Speciale kundër Kryesuesit dhe anëtarëve të Bordit të Zyrës së Rregullatorit për Energji (ZRRE).
“Kallëzimi bazohet në dyshimet se zyrtarët e ZRRE-së kanë kryer disa vepra penale, përfshirë mos-ekzekutimin e vendimit gjyqësor, keqpërdorimin e pozitës apo autoritetit zyrtar, shkeljen e detyrimit zyrtar, mashtrimin në detyrë dhe cenimin e interesit ekonomik public”, thuhet në njoftim.
Sipas OEK-ut, ky veprim vjen pasi Bordi i ZRRE-së ka refuzuar të zbatojë aktgjykimin e formës së prerë të Gjykatës Supreme, i cili parasheh që bizneset e larguara me detyrim nga tregu i rregulluar të kthehen me çmime të rregulluara, dhe jo të mbeten në tregun e lirë me tarifa më të larta.
OEK akuzon ZRRE-në se ka “injoruar dhe keqinterpretuar” vendimin e Gjykatës Supreme, duke shkaktuar dëm të konsiderueshëm ekonomik për bizneset dhe qytetarët e Kosovës.
“Megjithatë, Bordi i ZRRE-së ka vendosur të injorojë dhe keqinterpretojë këtë aktgjykim, duke dëmtuar bizneset dhe qytetarët e Kosovës, me fatura energjetike më të lartat në historinë e Republikës”, thuhet në njoftim.
Kallëzimi penal është mbështetur me dokumentacion zyrtar, komunikata të ZRRE-së dhe materiale që, sipas OEK-ut, dëshmojnë dëmet ekonomike të shkaktuara.
Në komunikatën e saj, OEK thekson se mbetet e vendosur në misionin e saj për të mbrojtur interesat e biznesit dhe qytetarëve në Kosovë.
