Shërbimet e Policisë Kufitare të Morinës, në bashkëpunim me Drejtorinë Vendore të Policisë Kukës, kanë arrestuar në hyrje të Republikës së Shqipërisë një shtetas kosovar, i shpallur në kërkim ndërkombëtar.
Sipas njoftimit nga Policia Kufitare, i arrestuari është B. K., 39 vjeç, banues në Kosovë, i cili ishte i dënuar nga autoritetet lituaneze me 2 vjet e 3 muaj burgim. Kapja e tij u bë si rezultat i kontrolleve me përzgjedhje dhe verifikimeve të shtuara në hyrje/dalje të vendit, me qëllim goditjen e paligjshmërive në kufi dhe ndalimin e personave në kërkim që tentojnë t’i shmangen drejtësisë.
“Nga verifikimet e kryera dhe informacioni i shkëmbyer me Interpol Tiranën, rezultoi se 39-vjeçari ishte shpallur në kërkim ndërkombëtar nga Interpol Vilnius, pasi Gjykata e Vilniusit e ka dënuar për veprën penale “Dëmtimi i papërfillshëm i shëndetit, kërcënimi për të vrarë ose për t’i shkaktuar një personi një dëmtim të rëndë shëndeti, ose terrorizimi i një personi””, thuhet në njoftim.
Interpol Tirana, në bashkëpunim me autoritetet homologe në Lituani, vijon procedurat ligjore për ekstradimin e 39-vjeçarit.
