Si pasojë e reshjeve të shumta të shiut lumenjtë në komunën e Gjakovës kanë shkaktuar vërshime në disa zona të këtij qyteti.
Prandaj për të menaxhuar këtë situatë është formuar Shtabi Lokal për Menaxhimin e Krizave, me pjesëmarrjen e të gjitha institucioneve përkatëse.
Komuna e Gjakovës thotë se në disa lagje, si Dardania, Brekoci dhe Fshati i Gjelbër, janë kryer evakuime të familjeve të prekura.
Ndërkohë, kanë bërë të ditur se për familjet që kanë nevojë për strehim, komuna po kujdeset duke i akomoduar përkohësisht në banesat sociale.
“Zjarrfikësit janë në terren gjatë gjithë kohës duke ndihmuar qytetarët, ndërsa kompania “Çabrati” po merret me pastrimin e urave dhe zonave më problematike. Situata po monitorohet edhe nga Policia e Kosovës, e cila konfirmon se gjendja është nën kontroll dhe fatmirësisht nuk ka dëme në njerëz, por vetëm dëme materiale”, thuhet në njoftimin e komunës së Gjakovës.
Ata kanë bërë të ditur se të gjitha ekipet emergjente janë në gjendje gatishmërie.
Komuna e Gjakovës thotë se 24 orët e ardhshme pritet të jenë më të ndjeshme, prandaj kanë apeluar tek qytetarët të jenë të kujdesshëm dhe të shmangin lëvizjet pranë lumenjve, të jenë vigjilentë dhe për çdo problem të njoftojnë ekipet emergjente, Policinë apo Zjarrfikësit.
