Ministrja në detyrë e Arsimit, Shkencës, Teknologjisë dhe Inovacionit, Arbërie Nagavci, ka njoftuar përmes një postimi në rrjetin social Facebook se fillimi i procesit mësimor për gjysmëvjetorin e dytë të vitit shkollor 2025/2026 do të shtyhet deri më 12 janar 2026.
Sipas njoftimit të saj, vendimi është marrë nga MASHTI si pasojë e reshjeve të fundit atmosferike dhe kushteve të vështirësuara në disa zona të vendit.
Nagavci ka theksuar se situata e rënduar nga vërshimet në shumicën e komunave, vështirësitë në qarkullim dhe problemet infrastrukturore e kanë bërë të pamundur fillimin e mësimit sipas planifikimit fillestar.
Ajo ka bërë të ditur se, bazuar në parashikimet e Institutit Hidrometeorologjik të Kosovës (IHMK), reshjet pritet të vazhdojnë edhe në ditët në vijim, duke shkaktuar vërshime lokale, pengesa në trafik dhe probleme në sistemet e kanalizimit. Për këtë arsye, pushimi dimëror do të vazhdojë edhe për dy ditë, më 8 dhe 9 janar, në nivel vendi.
Ministrja në detyrë ka njoftuar se mësimi për gjysmëvjetorin e dytë do të fillojë të hënën, më 12 janar 2026, ndërsa orët e humbura gjatë këtyre dy ditëve do të zëvendësohen gjatë pjesës së dytë të vitit shkollor për të gjitha nivelet e arsimit parauniversitar.
Nagavci ka theksuar se MAShTI është në komunikim të vazhdueshëm me Drejtoritë Komunale të Arsimit dhe ka falënderuar prindërit, nxënësit dhe mësimdhënësit për mirëkuptimin, duke ritheksuar se siguria e nxënësve dhe e stafit arsimor mbetet prioritet kryesor.
