Një aksion i gjerë policor, i udhëhequr nga Prokuroria Themelore e Prizrenit, është duke u zhvilluar sot në disa komuna të Kosovës, ku janë përfshirë mbi 300 zyrtarë policorë të Njësisë për Hetimin e Krimeve Ekonomike.
Operacioni po realizohet në koordinim me një numër të madh prokurorësh dhe deri tani janë arrestuar disa persona në rajonet e Prizrenit, Prishtinës, Pejës, Gjilanit, Ferizajt, Mitrovicës dhe Gjakovës.
Nga Prokuroria Themelore në Prizren kanë konfirmuar se aksioni është ende në zhvillim dhe se shtrihet në të gjitha komunat e Kosovës. Është bërë e ditur se hetimet janë duke u zhvilluar ndaj mbi 40 personave, të cilët dyshohet se kanë qenë të përfshirë në veprimtari të kundërligjshme, përfshirë edhe ish-drejtues të Byrosë së Sigurimeve.
