Prokuroria Themelore në Ferizaj, Departamenti për Krime të Rënda, ka ngritur aktakuzë ndaj gjashtë personave lidhur me vrasjen e zyrtarit policor në Kaçanik, rreshterit M.L.
Sipas njoftimit, pas zhvillimit të hetimeve dhe sigurimit të provave, aktakuza është ngritur kundër të pandehurve me inicialet H.B, R.M, V.Ç, E.L, SH.K dhe D.G, për shkak të dyshimit të bazuar mirë se në bashkëkryerje kanë kryer veprën penale “Vrasje e rëndë”, nga neni 173 paragrafi 1 nënparagrafi 1.9 lidhur me nenin 31 të Kodit Penal të Republikës së Kosovës.
Në aktakuzë thuhet se më 01 prill 2025, rreth orës 23:00, në Kaçanik, afër vendbanimit të viktimës, të pandehurit në bashkëkryerje me një të mitur, me dashje dhe përgatitje paraprake, kanë privuar nga jeta zyrtarin policor M.L. me armë zjarri. Si pasojë e plagëve të shkaktuara nga të shtënat, viktima ka ndërruar jetë, ndërsa të pandehurit janë larguar nga vendi i ngjarjes.
Prokurori i çështjes i ka propozuar Gjykatës që, pas shqyrtimit gjyqësor dhe administrimit të provave, të pandehurit të shpallen fajtor dhe të dënohen sipas ligjit. Po ashtu, është propozuar që masa e paraburgimit ndaj tyre të vazhdohet deri në përfundim të shqyrtimit gjyqësor.
