Incidenti ndodhi të shtunën në një garë për të rinj të moshës shtatë deri në 16 vjeç, të mbajtur në qytetin Bielsko-Biała, rreth 50 kilometra në jugperëndim të Krakovës. Siç thuhet në deklaratën e ambasadës të publikuar në Twitter, ekipi izraelit i xhudos u “sulmua verbalisht dhe fizikisht”.
“Nuk ka vend për dhunë apo fyerje antisemite të asnjë lloji, veçanërisht në sport”, tha ambasada, duke u bërë thirrje autoriteteve polake të sanksionojnë ata që janë përgjegjës.
Ngjarja u transmetua drejtpërdrejt, dhe përballja u regjistrua dhe u transmetua në internet. Videoja tregon shtytjen në palestër ndërsa fëmijët lëvizin shumë afër, por nuk zbulon se si filloi incidenti.
Nga ana tjetër, policia polake dhe organizatorët e turneut paraqesin një version tjetër të ngjarjeve. Zëdhënësi i policisë së Bielsko-Biała-s, Sławomir Kocur, i tha TV24 se me të mbërritur në vendngjarje, oficerët konfirmuan pretendimet e organizatorëve se trajneri izraelit ishte i pari që nisi kontaktin fizik.
“Ne folëm me të gjitha palët e përfshira dhe i informuam ata për mundësinë e ngritjes së akuzave. Asnjëra nga palët nuk e bëri këtë. Situata është qetësuar”, tha Kocur.
Presidenti i klubit Bielsko-Biała Janosik dhe organizatori i turneut, Tomasz Chmielniak, tha se “xhudistët e rinj izraelitë sigurisht që nuk u sulmuan” dhe se, sipas tij, gjyqtari ishte shënjestra e agresionit të trajnerit izraelit.
“Klubi izraelit u përjashtua nga gara për shkak të sjelljes agresive dhe shkeljes së parimeve të lojës së drejtë”, shtoi Chmielniak.
Turneu i quajtur “Kapërcimi i Kufijve” u mbajt për herë të 14-të dhe mblodhi së bashku atletë nga 15 vende, dhe këtë vit Izraeli mori pjesë për herë të parë. Një nga dy klubet izraelite vazhdoi garën dhe fitoi disa medalje.
