Reçaku ishte dhe mbetet pjesë e pandashme e betejës për të vërtetën dhe drejtësinë. Kështu tha kryeministri në detyrë i Republikës së Kosovës, Albin Kurti, gjatë Akademisë Përkujtimore në Reçak, me rastin e 27-vjetorit të masakrës, ku u vranë 45 civilë shqiptarë nga forcat paramilitare serbe më 15 janar të vitit 1999.
Kurti theksoi se kjo masakër ka qenë në qendër të procesit gjyqësor kundër Sllobodan Millosheviqit para Tribunalit Penal Ndërkombëtar për ish-Jugosllavinë.
“Edhe pse ky proces nuk u përmbyll me një gjykim për shkak të vdekjes së Millosheviqit, faktet dhe dëshmitë për Reçakun mbetën të regjistruara në drejtësinë ndërkombëtare si konfirmim se e vërteta për këto krime nuk mund të mohohet dhe se drejtësia, sado e vonuar, mbetet detyrim moral dhe historik”, tha Kurti.
Ai gjithashtu përkujtoi sakrificën e familjarëve dhe të gjithë atyre që luftuan për lirinë e Kosovës.
“Sot, në përvjetorin e 27-të, jemi bashkë për të përmbushur përgjegjësitë tona njerëzore dhe shtetërore që e tejkalojnë kohën, obligimin ndaj kujtesës, së vërtetës dhe drejtësisë. Të dashur familjarë të të vrarëve në Masakrën e Reçakut, ju fëmijë dhe pasardhës të martirëve dhe dëshmorëve, sot këtu në Reçak ju përkulemi me respekt të thellë. Dhimbja juaj është dhimbja jonë. Shteti ynë, Republika e Kosovës, ku sot jetojmë të lirë, i ka rrënjët në gjakun e derdhur të martirëve dhe dëshmorëve gjatë luftës së Ushtrisë Çlirimtare të Kosovës, në sakrificën dhe qëndresën e popullit tonë liridashës”, tha tutje kryeministri në detyrë.
Kurti nënvizoi edhe përparimin e Kosovës në rrugën e drejtësisë për krimet e luftës, duke përmendur aktakuzën e ngritur në dhjetor të vitit 2025 nga Prokuroria Speciale ndaj 21 personave për Masakrën e Reçakut.
“Kjo aktakuzë afirmon se krimi ka autorë, se e vërteta nuk parashkruhet dhe se drejtësia nuk ndalet, edhe kur kriminelët fshihen apo strehohen në Serbi”, tha ai.
