Partia Demokratike e Kosovës (PDK) ka reaguar pas njoftimit të Gjykatës Speciale se nga 9 deri më 18 shkurt do të mbahen deklaratat përmbyllëse në procesin gjyqësor ndaj Hashim Thaçit, Kadri Veselit, Jakup Krasniqit dhe Rexhep Selimit, të cilët ndodhen në paraburgim në Hagë për më shumë se pesë vjet.
Në një komunikatë, PDK thekson se procesi gjyqësor, i cili sipas saj është shoqëruar me problematika serioze, duhet të përmbyllet me drejtësi të plotë. Partia vlerëson se gjykimi është karakterizuar nga zvarritje të panevojshme, paqartësi procedurale dhe vendime që kanë ngritur shqetësime për standardet e drejtësisë dhe respektimin e të drejtave themelore të njeriut.
PDK nënvizon se këto rrethana kanë dëmtuar perceptimin e drejtësisë së barabartë dhe kanë rënduar padrejtësisht mbi ish-udhëheqësit e Ushtrisë Çlirimtare të Kosovës dhe të shtetit të Kosovës, të cilët janë mbajtur në paraburgim për një periudhë të gjatë.
“Në fazën përmbyllëse të procesit është thelbësore që gjykimi të fokusohet vetëm në fakte dhe prova, duke u distancuar nga çdo qasje politike, interpretuese apo spekulative që e ka shoqëruar këtë proces ndër vite,” thuhet në komunikatë.
Partia thekson gjithashtu se dëshmitarët kyç kanë rrëzuar pretendimet kryesore të aktakuzës, duke hedhur poshtë dyshimet për përgjegjësi individuale, grupore apo komanduese. Këto dëshmi, sipas PDK-së, kanë qenë vendimtare për sqarimin e rrethanave faktike dhe dobësimin e bazës së akuzave të prokurorisë.
Në përfundim, PDK shpreh përkushtimin e saj ndaj sundimit të ligjit, paqes dhe drejtësisë, duke theksuar se vetëm një vendim i drejtë dhe profesional mund të kontribuojë në mbylljen e këtij kapitulli të rëndësishëm për Kosovën, drejtësinë ndërkombëtare dhe të ardhmen e rajonit.
