Edhe pse Trump ka këmbëngulur prej muajsh që SHBA-të duhet të kontrollojnë Groenlandën, një territor autonom brenda Mbretërisë së Danimarkës, kjo është hera e parë që presidenti republikan ka përmendur në mënyrë të qartë përdorimin e tarifave si një mjet shtrëngimi për të arritur këtë qëllim.
“Mund të vendos tarifa për vendet nëse nuk bien dakord për çështjen e Groenlandës, sepse ne kemi nevojë për Groenlandën për sigurinë kombëtare”, tha Trump në Shtëpinë e Bardhë, pa dhënë detaje specifike se cilat vende mund të preken ose sasinë e tarifave të mundshme.
Trump pretendon se Shtetet e Bashkuara kanë nevojë për Groenlandën për shkak të burimeve të saj të pasura minerale dhe ka kritikuar Danimarkën se nuk ka bërë mjaftueshëm për të siguruar zonën strategjikisht të rëndësishme, pavarësisht se ishulli mbulohet nga ombrella e sigurisë e NATO-s.
Kongresmenët amerikanë në Danimarkë: “Është vetëm një njeri”
Ndërsa Trump kërcënon me masa ekonomike, një delegacion dypartiak nga Kongresi Amerikan udhëtoi për në Kopenhagen për të treguar solidaritet me Danimarkën dhe popullin e Grenlandës. Delegacioni, i përbërë nga demokratë dhe republikanë, po përpiqet të bindë aleatët evropianë se pikëpamjet e presidentit nuk pasqyrojnë vullnetin e popullit amerikan.
“Ne po tregojmë solidaritet dypartiak me popullin e këtij vendi dhe me Groenlandën. Ata kanë qenë miqtë dhe aleatët tanë për dekada të tëra”, u tha gazetarëve senatori demokrat Dick Durbin. “Deklaratat që po bën presidenti nuk pasqyrojnë se si ndihet populli amerikan.”
Senatorja Jeanne Shaheen paralajmëroi se ky lloj retorike po minon NATO-n dhe po u shërben kundërshtarëve kryesorë, Rusisë dhe Kinës.
Në përgjigje të presionit, udhëheqësit evropianë kanë mbajtur anën e Danimarkës. Ministri i Jashtëm danez Lars Løkke Rasmussen përsëriti se një marrje e Grenlandës nga SHBA-të është “jashtë diskutimit”.
Në të njëjtën kohë, disa vende evropiane, përfshirë Francën, Britaninë e Madhe, Gjermaninë dhe Suedinë, njoftuan vendosjen e një numri më të vogël të personelit ushtarak në Groenlandë për ushtrime. Ministrja franceze e Forcave të Armatosura, Alice Rufo, tha se qëllimi ishte t’u dërgohej një sinjal të gjithëve, përfshirë SHBA-në, se vendet evropiane janë të vendosura të mbrojnë sovranitetin e tyre.
Protesta dhe opinione të ndara në Uashington
Pavarësisht kundërshtimit nga Kongresi dhe sondazheve që tregojnë se vetëm 17 përqind e amerikanëve mbështesin marrjen e Grenlandës (rezultate që Trump i quajti “të rreme”), Shtëpia e Bardhë nuk po dorëzohet. Jeff Landry, i dërguari special i Trump për Grenlandën, i tha Fox News se besonte që marrëveshja do të arrihej përsëri sepse “presidenti është serioz dhe i ka bërë kërkesa të qarta Danimarkës”.
Demonstrata të mëdha janë paralajmëruar për nesër në të gjithë Danimarkën dhe Groenlandën, ku qytetarët do të protestojnë kundër ambicieve territoriale të Trump.
