Presidenti i SHBA-së, Donald Trump, ka njoftuar një valë rritjesh të tarifave ndaj aleatëve evropianë derisa Shtetet e Bashkuara të lejohen të blejnë Groenlandën.
Në një postim në Truth Social, Trump tha se tarifat prej 10% do të hyjnë në fuqi më 1 shkurt për Danimarkën, Norvegjinë, Suedinë, Francën, Gjermaninë, Mbretërinë e Bashkuar, Holandën dhe Finlandën. Këto tarifa do të rriten në 25% më 1 qershor dhe do të mbeten në fuqi derisa të arrihet një marrëveshje për blerjen e Grenlandës nga SHBA-të, tha Trump.
Trump akuzoi disa vende evropiane se po luanin një “lojë shumë të rrezikshme” në Grenlandë, duke thënë se “paqja botërore është në rrezik”. “Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda shkuan në Grenlandë me një qëllim të panjohur. (…) Këto vende, duke luajtur këtë lojë shumë të rrezikshme, morën një rrezik të papranueshëm”, shkroi presidenti amerikan në një postim të gjatë në rrjetin e tij social.
Presidenti i Partisë Popullore Evropiane (PPE) në Parlamentin Evropian, Manfred Weber, i ka bërë thirrje Bashkimit Evropian që të pezullojë miratimin e marrëveshjes tregtare me Shtetet e Bashkuara. Marrëveshja midis BE-së dhe SHBA-së u arrit verën e kaluar, por ende nuk është ratifikuar. Sipas kushteve të marrëveshjes, shumica e produkteve evropiane në tregun amerikan duhet t’i nënshtrohen një tarife prej 15 përqind, por kjo përqindje mund të rritet për shkak të kërcënimeve të reja.
