Kryetari i Aleancës për Ardhmërinë e Kosovës, Ramush Haradinaj, ka kërkuar rinumërim të plotë të votave të zgjedhjeve të parakohshme për Kuvendin e Kosovës. Ai ka thënë se pa një rinumërim të plotë nuk sigurohet integriteti i zgjedhjeve.
“Rinumërimi i pjesshëm i votave të kandidatëve po e nxjerr në shesh një skemë manipulimi të përmasave shqetësuese të votës së qytetarit. Procesi i këtyre zgjedhjeve qysh sot është lënduar dhe pas këtyre gjetjeve, vota duhet të rinumërohet një për një. Pa rinumërim të tërësishëm, nuk sigurohet integriteti i këtyre zgjedhjeve”, ka shkruar Haradinaj në Facebook.
Ai ka shprehur habinë që Prokuroria nuk është vënë në lëvizje qysh sot.
“Demokracia nuk mund të jetë viktimë e një grushti hajdutësh. Apeloj tek të gjithë mekanizmat që me vendimet e veprimet e tyre ta mbrojnë votën e qytetarit dhe ta rikthejnë integritetin e zgjedhjeve të 28 Dhjetorit. Çdo drejtim tjetër do të kishte pasoja të pariparueshme”, ka shkruar tutje Haradinaj.
Në fakt, procesi i rinumërimit të votave në 445 vendvoditme nga gjithsej 914 sa kanë shkuar me vendim të KQZ-së vë në pah ndryshime të dukshme në numrin e votave për kandidatët e subjekteve parlamentare. Disa deputetë kanë përfituar vota shtesë nga rinumërimi, ndërsa disa të tjerëve u është zbritur dukshëm numri i votave.
