Agjencia e Statistikave të Kosovës (ASK) ka publikuar Indeksin e Çmimeve të Prodhimeve dhe Çmimet në Bujqësi për tremujorin e katërt të vitit 2025, sipas të cilit vërehet rritje e indeksit të përgjithshëm të çmimeve të prodhimeve bujqësore krahasuar me të njëjtën periudhë të vitit 2024.
Sipas ASK-së, indeksi i përgjithshëm i prodhimeve bujqësore në TM4 2025 ka shënuar rritje prej 1,2%, krahasuar me TM4 2024. Kjo rritje është ndikuar kryesisht nga çmimet e prodhimeve blegtorale.
Ndërkohë, indeksi i çmimeve të prodhimeve bimore ka shënuar rënie prej 0,8%, duke kaluar nga 147.9 në 146.7. Në anën tjetër, prodhimet blegtorale kanë shënuar rritje prej 4,9%, duke u rritur nga 150.7 në 158.0.
ASK bën të ditur se të dhënat janë mbledhur nga tregjet, fermat dhe lokacione të tjera ku tregtohen prodhime bujqësore vendore në Kosovë.
Prodhimet që përfshihen në llogaritjen e indeksit janë ndarë në dy grupe kryesore: prodhime bimore dhe prodhime blegtorale. Në kuadër të prodhimeve bimore janë përfshirë çmimet e drithërave, bimëve foragjere, perimeve, patateve dhe pemëve. Ndërsa prodhimet blegtorale përfshijnë çmimet e kafshëve (gjedhe, dele, derra dhe pula), të bazuara në peshën e gjallë, si dhe çmimet e qumështit, vezëve dhe mjaltit.
Të gjitha çmimet janë llogaritur në euro, ndërsa njësitë matëse janë kilogram, litër dhe copë.
