erminali kroat ofron një alternativë gazi për Serbinë dhe Bosnjë-Hercegovinën
“Kroacia planifikon të ndërtojë një lidhje gazi 15-kilometërshe me Serbinë, e cila do t’i sigurojë sistemit të gazit të Serbisë qasje në terminalin e gazit natyror të lëngshëm (LNG) në ishullin Krk,” deklaroi ministri kroat i ekonomisë, Ante Shushnjar, gjatë një konference energjetike të organizuar nga gazeta Jutarnji list. Shushnjar theksoi se Beogradi tashmë ka shprehur interes për qasje në gaz të lëngshëm nga Shtetet e Bashkuara përmes këtij projekti.
Ndërkohë, Bosnjë-Hercegovina ka pranuar një letër qëllimi nga kompania amerikane AAFS Infrastructure and Energypër ndërtimin e gazsjellësit “Lidhja Interkonektive Jugore”, me vlerë 200 milionë dollarë. Tubacioni do të jetë një alternativë ndaj “Rrjedhës Turke”. Ndërtimi pritet të nisë në vitin 2026, raportojnë N1 dhe kix.ba. Gazsjellësi i ri do ta lidhë Bosnjë-Hercegovinën me terminalin e gazit natyror të lëngshëm (LNG) në ishullin kroat Krk.
Pentagoni dërgon tanke “Abrams” në Rumani
Shtetet e Bashkuara do të vendosin ushtarë amerikanë me tanke “Abrams” në Rumani, njoftoi shefi i Shtabit të Përgjithshëm të vendit, gjenerali Gheorghiță Vlad, për televizionin shtetëror TVT INFO.
Njësia që do të mbërrijë në Rumani është pjesë e pranisë amerikane në rajon, e cila realizohet mbi bazë rotacioni dhe nuk përbën rritje të numrit të trupave. Tanket “Abrams” janë mjetet kryesore të blinduara të ushtrisë amerikane dhe konsiderohen ndër më modernet në botë. Rumania është në procesin e blerjes së 54 prej këtyre mjeteve.
Në tetor 2025, Pentagoni njoftoi se do të kufizojë praninë e tij ushtarake në Rumani, duke tërhequr një batalion nga brigada rrotulluese në krahun juglindor të NATO-s, por do të lërë rreth 3 500 ushtarë në vend.
MOL fitoi pronësinë e rafinerisë së vetme të naftës në Serbi
Presidenti serb Aleksandar Vuçiç deklaroi se kompania hungareze e naftës MOL po blen pjesën ruse prej 56% në kompaninë serbe të naftës NIS, me një çmim ndërmjet 900 milionë dhe 1 miliard euro. “Kishim gati 2 miliardë euro për të paguar. Edhe po të paguanim më shumë se kaq,” tha Vuçiç për televizionin Blic. Ai shtoi se “e shpjegon lehtë” pse pjesa ruse në NIS nuk iu ofrua Serbisë, por nuk dëshironte ta thoshte publikisht për të mos rrezikuar “interesat e shtetit”. “Për mua këto arsye janë të qarta dhe të padiskutueshme, por nëse janë të pranueshme është çështje tjetër. Megjithatë, disi nuk mund t’i quajmë pikërisht miqësore,” tha ai.
Rafineria e NIS-it në Pançevë u mbyll në fund të vitit 2025 për shkak të pronësisë me shumicë ruse dhe Beogradi u detyrua të gjente një blerës të ri, në mënyrë që të hiqeshin sanksionet amerikane ndaj NIS-it dhe rafineria të rifillonte punën.
Grekët jashtë vendit do të mund të votojnë me postë
Athina po përgatit një ligj që do të lejojë grekët jashtë vendit të votojnë me postë në zgjedhjet kombëtare, njofton gazeta Kathimerini. Grekët e diasporës do të kenë një zonë të posaçme elektorale me tre deputetë të diasporës në parlamentin prej 300 vendesh. Reforma vjen dy vjet pas vendosjes së votimit me postë në zgjedhjet për Parlamentin Evropian.
Kryeministri Kyriakos Mitsotakis deklaroi se, nëse ndryshimi miratohet, ai do të hyjë në fuqi në zgjedhjet e ardhshme parlamentare në vitin 2027. “Kjo do të bashkojë miliona grekë jashtë vendit me atdheun. Do të ishte shumë e dobishme që një kandidat nga Australia të konkurrojë me një kandidat nga Shtetet e Bashkuara dhe do të jetë një nxitje për grekët jashtë vendit që të votojnë,” theksoi ai.
Nismëtarët e ligjit theksojnë se bashkatdhetarët e tyre do të mund të votojnë nga vendbanimi i tyre, në vend që të përshkojnë distanca të gjata për të arritur te qendrat e votimit. Megjithatë, votimi me postë për zgjedhjet parlamentare do të lejohet vetëm për votuesit jashtë vendit.
Kryetarët e bashkive nga rrjeti B40 kërkojnë lirinë për Ekrem Imamoglu dhe Erion Veliaj
Kryetarët e bashkive anëtare të Rrjetit të Qyteteve Ballkanike B40 kanë nënshkruar një letër të përbashkët në mbështetje të kryetarëve të arrestuar të Stambollit, Ekrem Imamoglu, dhe të Tiranës, Erion Veliaj, njofton euronews.al. Nënshkruesit i referohen një raporti të Komisionit të Venecias nga tetori 2025 dhe Konventës Evropiane për të Drejtat e Njeriut, ku theksohet se arrestimi duhet të jetë masë e fundit dhe jo mjet për të penguar ushtrimin e mandatit për arsye politike, vëren portali.
Ata theksojnë se nuk kërkojnë imunitet për dy kryetarët e bashkive dhe as nuk komentojnë thelbin e akuzave, fajësinë apo pafajësinë e të arrestuarve, duke shtuar se thirrja e tyre është “parimore dhe në përputhje me standardet evropiane”. “Arrestimet minojnë vullnetin e zgjedhësve dhe përbëjnë një kërcënim të drejtpërdrejtë për demokracitë vendore”, thuhet në letër./RB
