Pas mbledhjes së kryesisë së Kosovës, Shefja e Grupit Parlamentar të Lëvizjes Vetëvendosje, Mimoza Kusari-Lila ka thënë se Qeveria nuk ka asnjë përplasje me SHBA-në dhe as nuk ka pasur.
Ajo ka thënë se mund të kenë qëndrime të ndryshme. “Ambasada ka ftuar nga pozita ministrat e dikastereve të veçanta”, ka thënë ajo. Tutje ka shtuar se kanë miratuar mbajtjen e dy seancave në mbledhjen e Kryesisë. Të mërkurën do të ketë vazhdim të seancës e cila do të fillojë nga ora 12:00, ndërkaq është caktuar edhe seancë e re për të enjten.
Tahiri: Marrëdhënia jonë me SHBA-të është jetike për Kosovën
Shefi i grupit të PDK-së, Abelard Tahiri, tha se raportet e qeverisë së Kosovës me SHBA-të, janë shqetësuese.“Marrëdhënia jonë me SHBA-të është jetike për ta fuqizuar Kosovën dhe përgjegjës për gjendjen e krijuar në raport me SHBA-të, nuk është opozita, por qeveria dhe Albin Kurti”, theksoi ai.
