Policia e stacionit në Shtime, njofton se me datën 26 janar 2023 rreth orës 13:10, kishte pranuar një informacion se në rrugën “12 Qershori” në filialen e KESCO në Shtime ishte një rast i grabitjes, ku dy persona të dyshuar me maska, nën kërcënimin e armëve së zjarrit arrin, grabisin para rreth katër mijë euro.
Të maskuarit, sipas policisë, largohen me një automjet Tauran dhe më pas i vënë flakën në rrugën që çon për në fshatin Jezercë, dhe nga aty largohen me një automjet tjetër në drejtim të panjohur.
Në këtë rast, veç policëve të rendit dhe policëve hetues të stacionit në Shtime, thuhet se janë kyçur edhe hetuesit dhe krimteknikët nga Sektori Rajonal i Hetimeve, të cilët nën autorizim të prokurorit nga Prokuroria Themelore në Ferizaj i kishin nisur hetimet.
“Pas një pune intenzive hetimore, grumbullimit të informacioneve në terren, shikimit të kamerave të sigurisë, hetuesi rajonal kanë identifikuar automjetin me të cilin janë larguar të dyshuarit pasi kanë vënë flakën automjetit që kishin kryer grabitjen dhe sot, datë 01.02.2023 në ora 01:20 në Ferizaj, kanë ndaluar dhe më pas kanë arrestuar të dyshuarin e parë të kësaj ngjarje mashkull, kosovar i moshës 35 vjeçar”, njofton policia.
I arrestuari është dërguar në Policinë Rajonale të Ferizajt, përkatësisht në Sektorin Rajonal të Hetimeve dhe pas intervistimit nga policët hetues, me vendim të prokurorit të rastit dërgohet në mbajtje për 48 orë për procedura të mëtejme hetimore.
Sipas të njëjtit njoftim, i arrestuari dyshohet se ka kryer veprën penale ” Grabitje”, ndërsa në kërkim policor mbeten të dyshuarit tjerë.
