Ministri i Shëndetësisë, Arben Vitia, ka folur për listat e pritjes së pacientëve për të marrë shërbime në klinikat e QKUK-së.
Gjatë raportimit të tij në Komisionin për Shëndetësi, Vitia ka thënë se gjatë vitit 2022 është arritur që në disa klinika të caktuara të reduktohen listat e pritjes, siç është rasti në Klinikën e Oftalmologjisë dhe në Klinikën e Gastroenterologjisë.
“Për sëmundje të caktuara kryesisht të natyrës kirurgjike prej vitesh janë caktuar lista të gjata pritjes ku pacientët presin me muaj e në raste të caktuara edhe me vite në kryerjen e shërbimeve mjekësore siç është rasti me sëmundjen e venave varikoze në Klinikën e Kirurgjisë Vaskulare apo protezat e gjurit dhe kërdhokullës në Klinikën e Ortopedisë. Në këto klinika lista e pritjes daton prej vitesh dhe padyshim se pandemia e COVID-19 ka rënduar edhe më shumë këtë gjendje”, ka thënë Vitia.
Ministri ka shtuar se synimet janë që listat e pritjes të reduktohen deri në 50%.
“Në Klinikën e Kardiologjisë ka filluar evidentimi dhe prioritizimi i rasteve dhe është duke u analizuar edhe ofrimi shërbimi i kardiologjie në dy ndërrime për të reduktuar listën e pritjes. Në këtë klinikë është funksionalizuar edhe shërbimi i elektrofiziologjisë dhe nuk ka referime më jashtë vendit për këto shërbime”, u shpreh Vitia.
Vitia ka theksuar se në Klinikën e Radiologjisë nuk ka listë të pritjes për këto shërbime: biopsi, mamografi dhe CT apo tomografi të kompjuterizuar.
“Kemi listë të pritjes për rezonancë afërsisht 10 muaj për rastet elektive dhe joonkologjike. Listë që është trashëguar dhe është përkeqësuar edhe nga pandemia dhe vërshimet që ndodhen në këtë klinikë e cila afërsisht 6 muaj ka qenë jashtë funksionit”, tha Vitia.
Ministri foli edhe për funksionalizimin e rezonancës magnetike edhe në Spitalin e Pejës dhe Prizrenit.
“Në fund të muajit janar është funksionalizuar rezonanca magnetike në Onkologji, në Spitalin Pediatrik në QKUK dhe është në përfundim të funksionalizimit edhe rezonanca në Spitalin e Pejës dhe sipas bordit po punohet intensivisht që të vihet në funksion në fund të këtij muaji. Gjithashtu për këtë vit është në planifikim edhe funksionalizimi i rezonancës magnetike edhe në Spitalin e Prizrenit”, u shpreh ai.
Ministri gjithashtu bëri të ditur se në Klinikën e Gastroenterologjisë lista e pritjes ka qenë deri në 8 muaj për gastroskopi dhe kolonoskopi, por aktualisht krahas furnizimit me pajisje mjekësore koha e pritjes tani është rreth 2 javë.
“Në Klinikën e Oftalmologjisë lista e pritjes është vetëm për trajtimin e katëraktës afërsisht 5 muaj, ndërkaq për shërbime tjera nuk ka listë të pritjes. Në këtë klinikë në dy vitet e fundit është reduktuar edhe referimi i pacienteve për trajtim jashtë institucioneve publike shëndetësore për disa shërbime që kanë ndikuar në kursim të buxhetit të shtetit për rreth 1.5 milion euro në vit”, deklaroi Vitia.
Gjatë raportimit të tij në Komisionin për Shëndetësi, Vitia shtoi se listat e pritjes janë zakonisht si pasojë e numrit të vogël të anesteziologëve, problematikë kjo që nuk mund të zgjidhet për një kohë deri në stabilizim e resurseve njerëzore.
“Në Klinikën e Kirurgjisë Vaskulare ka filluar reduktimi i listës së pritjes pas funksionalizimit të pajisjes për trajnimin e venave me radiofrekuencë, për të cilin shërbim nuk ka nevojë për anesteziolog. Bordi drejtues ka raportuar së fundmi se aktualisht janë mbi 100 vende të lira në QKUK që do të plotësohen së shpejti me rekrutimin e stafit të ri ,kryesisht infermierë për të cilët kanë nevojë më shumë klinikat”, tha Vitia.
Objekti i Emergjencës në QKUK funksional së shpejti, në plan edhe një depo e re barnash
Ministri i Shëndetësisë, Arben Vitia, ka thënë se prioritet i tij gjatë këtij mandati do të jetë funksionalizimi i objektit të Emergjencës në QKUK, me ç’rast tha se janë buxhetuar mjetet shtesë.
Këtë e ka bërë të ditur gjatë raportimit në Komisionin për Shëndetësi dhe Mirëqenie Sociale. Krahas funksionalizimit të këtij objekti, Vitia, mes të tjerash, si prioritete përmendi edhe sigurimin e barnave esenciale dhe uljen e listës së pritjes.
“Urgjencat prioritare janë sigurimi i profesionistëve mjekësorë në fushat deficitare, zvogëlimi i listës së pritjes në nivelin terciar, ndërhyrjet infrastrukturore spitalore, vendosja e standardeve për pranimin e pacientëve. Kontrolli i barnave, përfshirë edhe kontrollin e tregut, mbikëqyrja e institucioneve private dhe të sigurisë, reformimi i referimit të pacientëve jashtë shtetit, hapja e konkurseve me standarde të reja e kështu më radhë”, vazhdoi Vitia.
“Me qëllim funksionalizimit të ndërtesës së Emergjencës është bërë buxhetimi i mjeteve shtesë, me qëllim përfundimin sa më të shpejtë. Kemi filluar përgatitjet për sigurimin e ndërtesës së depos së barnave, pasi kjo aktualja lë shumë për të dëshiruar”, tha Vitia, teksa përmendi edhe vaksinimin në Kosovë.
“Kosova ka pasur një vaksinim relativisht të mirë ndaj COVID-19, duke futur gjatë sezonit vjeshtë-dimër në funksion edhe përdorimin e dozave bivalente përforcuese të ‘Pfizer’-it te siguruara përmes COVAX-it, krahas dozave të mjaftueshme të siguruara më parë nga Qeveria dhe donatorët”, tha Vitia.
