Me organizimin e Qendres Kosovare për Rehabilitimin e Viktimave të Torturës e të mbështetur nga Ambasada e Mbretërisë së Bashkuar, në Prishtinë po bëhet prezantimi i rezultateve, të nxjerra nga hulumtimi për traumën ndërbrezore nga nënat e ekspozuara ndaj dhunës, gjatë luftës në Kosovë në vitet 1999-2000, si dhe fëmijët e tyre.
Rezultatet e hulumtimit po prezantohen në konferencën me titull: “A mundet terapia familjare të rikthej ndryshimet epigjenetike që mund të jenë të shkaktuara nga efektet e Çrregullimit të Stresit Pas Traumatik ( ÇSPT) amnor dhe traumës ndër brezore?
Fokusi kryesor i konferencës është të paraqesë rezultatet nga një studim unik i ndërhyrjes me terapi familjare.
Projekti është një studim unik vijues i rezultateve fillestare të rëndësishme që u botuan në revistën shkencore të Clinical Epigenetics vitin e kaluar.
“Ne kemi identifikuar ndryshimet në nivelin e ADN-së, të quajtura “epigjenetike”, si një pjesë kritike e munguar e informacionit kërkimor që nevojitet për të kuptuar se kur dhe pse ndryshimet në përgjigje të traumës shkaktojnë zhvillimin e çrregullimeve mendore përgjatë brezave”, deklaron QKRVT-ja në një komunikatë për media.
“Më e rëndësishmja, hulumtimi ynë gjithashtu ofron njohuri të reja se si të rikthehen apo tërhiqen ndryshime të tilla”.
Me këtë informacion, QKRVT-ja deklaron se tani ka potencial të identifikohen se çfarë ndërhyrjesh nevojiten, në çfarë kohe për nënat dhe foshnjat/fëmijët e tyre në rrezik të lartë të zhvillimit të çrregullimeve mendore të lidhura me traumën.
“Ky hulumtim është bërë në bashkëpunim me Institutin Dignity, Spitalin Universitar të Kopenhagës dhe Universitetin Monash në Australi, të cilat na kanë lejuar të kryejmë këtë projekt ndërdisiplinor, me qëllimin tonë të përbashkët për të përmirësuar shëndetinmendor të nënave dhe fëmijëve më të rrezikuar”.
