Drejtori i Departamentit te shëndetësisë së Komunës së Prishtinës, Izet Sadiku, ka paralajmëruar se së shpejti do të caktohet orari i kujdestarive të barnatoreve në kryeqytet.
Ky paralajmërim erdhi pas një takimi me përfaqësuesit e Odës së Farmacistëve të Kosovës në krye me dr. Arianit Jakupi kryetar për të diskutuar rregullimin e orarit të punës së barnatoreve dhe shërbimit farmaceutike në kryeqytet.
Ai pohoi se në krye të këtij dikasteri ka marrë ankesa nga qytetarët për mungesën e orarit të punës së kujdestarive të barnatoreve në kryeqytet.
“Ne kemi filluar diskutimet me OFK, Odën e Farmacistëve të Kosovës për të adresuar shqetësimin e qytetarëve dhe jemi pajtuar që duke pasuar parasysh rregulloret e komunës dhe rregulloret e OFM do të rregullojmë orarin e punës së barnatoreve në kryeqytet me çka do ta rrisim edhe profesionalizimin dhe cilësinë e këtij shërbimi në kryeqytet që është me interes për qytetarët e kryeqytetit”, tha ai. /Kosovatimes/
