Presidenti amerikan Joseph Biden, pas sulmit të armatosur gjatë fundjavës në Teksas, ku mbetën të vrarë tetë persona, përsëriti thirrjen e tij drejtuar Kongresit për të ndaluar armët sulmuese, raportojnë mediat amerikane.
“Edhe një herë, po i kërkoj Kongresit që të më dërgojë një projekt-ligj për të ndaluar armët sulmuese”, tha Biden në një deklaratë, duke dënuar sulmin në shtetin amerikan të Teksasit, ku një person i armatosur vrau tetë persona në një qendër tregtare. Sulmuesi, i cili u identifikua si Mauricio Garcia (33), u vra nga policia.
Biden e quajti sulmin një “akt të pakuptimtë dhune” dhe tha se ai “do ta nënshkruante menjëherë” projektligjin nëse Kongresi ia dërgonte atij.
