Partia Guxo dënon sulmet ndaj KFOR-it dhe u dëshiron shërim të shpejtë ushtarëve të plagosur dhe po ashtu dënon ashpër sulmet ndaj Policisë së Kosovës dhe mbështet fuqishëm punën e Policisë së Kosovës në kryerjen e detyrave kushtetuese. Kështu thuhet në një deklaratë të këtij subjekti i cili ka shprehur mbështetjen e fuqishme qëndrimin e institucioneve se kryetarët e komunave duhet të punojnë nga objektet zyrtare komunale. Ky subjekt thekson se pas zgjedhjeve të fundit lokale në komunat e veriut të vendit dhe betimit të kryetarëve të zgjedhur, vendosja e kryetarëve në objektet komunale për t’i kryer detyrat e tyre zyrtare, është obligim ligjor.
“Grupet e dirigjuara ekstremiste kriminale plasuan kërcënime publike dhe më 26 maj 2023 bllokuan hyrjen në objektet komunale. Ministria e Administrimit të Pushtetit Lokal kërkoi asistencë dhe Policia e Kosovës, në kuadër të kompetencave të saj ligjore, u detyrua të ndërmarrë masat e nevojshme për shpërndarje të turmës, pasi paraprakisht kishin kërkuar nga protestuesit të lirojnë hyrjet në objekte. Turma e ekstremistëve ka reaguar me dhunë në të tri komunat (Leposaviq, Zveçan dhe Zubin Potok), por më së shumti në Zveçan, dhe nga sulmet me mjete të ndryshme, janë lënduar 5 zyrtarë policorë si dhe janë shkaktuar dëme materiale. Kryetarët e Komunave janë vendosur në zyrat e tyre sipas kërkesës së MAPL-së”, thekson subjekti “Guxo”.
Sipas tyre i njëjti skenar i grupeve të organizuara kriminale ka filluar të zbatohet edhe në mëngjesin e datës 29 maj 2023 dhe përplasjet mes protestuesve të dhunshëm, të maskuar e të armatosur, janë zgjeruar edhe me KFOR-in dhe, për pasojë, mbi 30 ushtarë të KFOR-it janë lënduar, 3 nga ta me armë zjarri. Partia Guxo dënon sulmet ndaj KFOR-it dhe u dëshiron shërim të shpejtë ushtarëve të plagosur duke falënderuar njëkohësisht KFOR-in për ndihmën e dhënë organeve të sigurisë për mirëmbajtjen e rendit dhe ambientit të qetë e të sigurt për të gjithë qytetarët e vendit.
Partia Guxo mbështet plotësisht institucionet e Republikës së Kosovës në përpjekjet demokratike për qeverisje lokale, për rend, rregull dhe ligj. Partia Guxo mbështet fuqishëm qëndrimin e institucioneve se kryetarët e komunave duhet të punojnë nga objektet zyrtare komunale dhe, natyrisht, në çdo ndërtesë zyrtare e qeveritare duhet të valojë flamuri i shtetit të Kosovës.
Ndwrsa dënon ashpër sulmet ndaj Policisë së Kosovës dhe mbështet fuqishëm punën e Policisë së Kosovës në kryerjen e detyrave kushtetuese, duke shprehur vlerësimin më të lartë për performancën profesionale të pjesëtarëve të saj në zbatimin e ligjeve të Republikës së Kosovës dhe në respektimin e të drejtave dhe lirive të njeriut.
Po ashtu, Partia Guxo mbështet komunikimin e sinqertë e të vazhdueshëm, bashkërendimin e bashkëpunimin e ngushtë të të gjitha institucioneve të Republikës së Kosovës me misionet e me partnerët ndërkombëtarë, veçanërisht me Shtetet e Bashkuara të Amerikës, me të cilin partneritet e bashkëpunim vëllazëror, Republika e Kosovës ka trasuar e ndërtuar rrugën e vet drejt lirisë, pavarësisë, demokracisë e zhvillimit të saj si shtet i pavarur, sovran e unik.
“Dënojmë sulmet e protestuesve të dhunshëm ndaj gazetarëve që po e kryejnë detyrën me dinjitet e profesionalizëm, gjë për të cilën meritojnë mirënjohjen tonë më të thellë. Falënderojmë të gjithë qytetarët e Kosovës për maturinë e qetësinë, për mbështetjen e institucioneve tona si dhe për respektimin e rendit dhe ligjeve të Republikës së Kosovës”.
Partia Guxo si subjekt politik, por edhe me anën e përfaqësuesve të vet në Qeveri, do të angazhohet për tejkalimin e kësaj situate në veri të vendit, mbi bazën e ligjit dhe në bashkëpunim të ngushtë me aleatët tanë strategjikë, SHBA-të dhe vendet e demokracive perëndimore.
“Sovraniteti i Republikës së Kosovës është i panegociueshëm. Forcimi i institucioneve demokratike të vendit, shtrirja e sundimit të ligjit në të gjithë territorin e Republikës së Kosovës i shërben të gjithë qytetarëve të saj pa asnjë dallim”, thekson ky subjekt. /Kosovatimes/
