Kancelari Olaf Scholz dhe presidenti francez Emmanuel Macron dëshirojnë bisedime të përbashkëta me presidenten e Kosovës Vjosa Osmani dhe presidentin serb Aleksandar Vuçiq, ka bërë të ditur zëdhënësi i qeverisë gjermane Steffen Hebestreit, shkruan Deutsche Welle.
Franca dhe SHBA-ja fajësojnë lidershipin në Kosovë për përshkallëzimin e situatës, shkruan DW, ndërsa Macron tha se “është mjaft e qartë se autoritetet e Kosovës janë përgjegjëse për situatën aktuale”.
Brukseli njoftoi në mars se qeveritë e dy vendeve kishin arritur një marrëveshje për normalizimin e marrëdhënieve. Megjithatë, as Beogradi dhe as Prishtina nuk e kanë nënshkruar atë.
Macron kritikoi Prishtinën për mosrespektimin e asaj marrëveshjeje, shkruan Deutsche Welle.
Siç shkruan DW, të mërkurën, demonstruesit në Zveçan shpalosën një flamur serb mbi 200 metra të gjatë që shtrihej nga ndërtesa e komunës deri në qendër të qytetit. Ata mbanin gjithashtu një flamur në nder të yllit të tenisit Novak Gjokoviç, i cili shkroi një mesazh në kamerën televizive në French Open në të cilin e përshkruan Kosovën si “zemrën e Serbisë”.
Më vonë, një protestë tjetër e qindra demonstruesve serbë para ndërtesës së komunës në Zveçan u ndërpre.
Siç raporton televizioni shtetëror RTS, raporton DW, protestuesit pritet të kthehen këtë të enjte. Ata kërkojnë tërheqjen e forcave të sigurisë së Kosovës nga rajoni me shumicë serbe dhe largimin e kryetarëve shqiptarë.
Ndryshe nga thirrjet e Bashkimit Evropian dhe SHBA-së për të ulur tensionet në rajon në vend që t’i nxisin ato, kryeministri i Kosovës Albin Kurti urdhëroi kryetarët e komunave të marrin detyrën javën e kaluar.
Kësaj i paraprinë zgjedhjet lokale të mbajtura nga autoritetet e Kosovës më 23 prill. Megjithatë, serbët e Kosovës, të cilët përbëjnë shumicën e popullsisë në veri, në masë të madhe i bojkotuan zgjedhjet, kështu që pakica shqiptare mori kontrollin e këshillave komunale, pavarësisht pjesëmarrjes nën 3.5 përqind. Shqiptarët e Kosovës fituan edhe në komunitetet me shumicë serbe.
Gjatë protestës të së hënës në Zveçan, shpërthyen përleshje të dhunshme ndërmjet demonstruesve dhe ushtarëve të KFOR-it, të cilët që nga viti 1999 janë ngarkuar të ofrojnë siguri në bazë të mandatit të OKB-së. 30 ushtarë dhe 52 demonstrues u plagosën.
