Presidentja e Kosovës, Vjosa Osmani ka udhëtuar për Podgoricë ku do të merrë pjesë në Procesin e Bashkëpunimit të Evropës Juglindore.
E para e shtetit tashmë ka mbërritur në vendin ku do të mbahet samiti në Podgoricë, ku është pritur nga presidenti i Malit të Zi, Jakov Milatoviq.
Gjatë samitit delegacionet e 13 shteteve pjesëmarrëse do të diskutojnë për paqen, sigurinë, stabilitetin e zhvillimin politik e ekonomik të vendeve të rajonit.
Presidentja e Kosovës, Vjosa Osmani ka udhëtuar për në Podgoricë ku është pritur nga presidenti i Malit te Zi, Jakov Milatoviq. Presidentja e Kosovës, Vjosa Osmani do të merrë pjesë në Procesin e Bashkëpunimit të Evropës Juglindore (SEECP).
Në Samit do të marrin pjesë Komisioneri Evropian për Zgjerimin Oliver Varhelji, Sekretarja e Përgjithshme e Këshillit për Bashkëpunim Rajonal Majlinda Bregu, si dhe përfaqësues të Shërbimit Evropian për Punët e Jashtme, Rumania, Greqia dhe Sllovenia.
Kabineti i Milatoviqit përkujtoi se korniza e bashkëpunimit rajonal të SEECP-së është krijuar në qershor të vitit 1996, me qëllim të promovimit dhe forcimit të marrëdhënieve të fqinjësisë së mirë ndërmjet vendeve të Evropës Juglindore.
Anëtarët e SEECP janë: Shqipëria, Bosnja dhe Hercegovina, Bullgaria, Mali i Zi, Greqia, Kroacia, Maqedonia e Veriut, Moldavia, Rumania, Sllovenia, Serbia, Turqia dhe Kosova.
Organi ekzekutiv i SEECP – Këshilli për Bashkëpunim Rajonal (RCC), përfshin 46 vende, organizata dhe institucione financiare ndërkombëtare.
Më 1 korrik, Maqedonia e Veriut merr presidencën e SEECP nga Mali i Zi.
