Shkruan: Pal ShTUFI
Kosova po kalon nëpër një situatë të rëndë politike, të shkaktuar nga arroganca e udhëheqësve tanë, të cilët bota demokratike nuk po i kupton. Natyrisht, jo për fajin e botës demokratike. Dhe në këto furtuna, deshëm ne apo jo, përfshihet Shqipëria – për të mirën tonë, natyrisht.
Është e pashmangshme!
Edi Rama duhet të merret me rajonin, sepse Shqipëria tash e sa kohë vlerësohet faktor tejet i rëndësishëm stabiliteti në rajon. Ajo po luan rolin e faktorit demokratik, që beson në paqe, dialog dhe miqësi të përhershme me ShBA-të.
Pra, qartësisht Edi Rama është në vazhdën e një tradite politike, duke përkrahur Kosovën në këto ngushtica. Dhe, si anëtare e NATO- s, Shqipëria po e bë këtë punë të mbarë. Po e bë mjaft mençur, duke e ruajtur Kosovën dhe të ardhmen e saj. Natyrisht, kjo përkrahje dallon nga ato të kaluarat, të cilat Shqipëria ia bënte Kosovës, para dhe gjatë luftës. Janë kohë dhe rrethana krejt tjera tani. Rrethana ku vlerë dhe përkrahje është mendja e hollë politike e jo lufta apo as luftë-nxitja, nacionalizmi primitiv apo paternalizmi i pështirë.
TË GJITHË JEMI TË GABUESHËM
Sa për dijeninë e qeveritarëve aktualë, Edi Rama është kalibër botëror i politikëbërjes. Shqipëria kurrë nuk ka pasur kryeministër më të ditur, më strateg dhe më largpamës. Mos të flasim për nivelin kulturor të tij, i cili lë prapa pothuajse të gjithë kryeministrat aktualë të Europës.
Dhe, kur i them këto, unë djathtisti i përhershëm, i kam parasysh edhe gabimet e Edi Ramës, këtij majtisti të përhershëm. Por, më thoni, a ka dikush në këtë botë, i cili mund të udhëheq shtetet shqiptare pa gabime? Mos u mundoni të përgjigjeni. Ju them unë, nuk ka.
Edi Rama është duke bërë punë të madhe për Kosovën dhe përtej saj. Që kemi sot miopë politik, të cilët i vlerësojnë politikanët në bazë të rrahjeve të gjoksit dhe retorikave demagogjike, Edi nuk ka faj në këtë shkretëtirë idesh.
TË GJITHË ME EDIN
Pos krahu i LVV, të gjitha partitë tjera, të majta ose të djathta në Kosovë, e miratojnë dhe çmojnë lart sjelljen politike të EdI Ramës. Këtë duhet ta bëjë sa më shpejt edhe qeveria aktuale, ashtu siç e ka bërë para do ditësh (jo publikisht) Presidentja e vendit.
Edi Rama është kompas politik në këtë mjegull politike që kemi shkaktuar në Kosovë.
