Ushtarët ukrainas po përdorin dronë të lirë, por cilësorë, për të goditur pozicionet ruse në rajonin e Donjeckut.
Edhe Ukraina, edhe Rusia, po e ripërcaktojnë luftimin modern, me përdorimin e dronëve ekonomikë, në atë që disa po e quajnë lufta e parë e plotë e dronëve.
Përdorimi i dronëve në qiellin mbi Ukrainën është aq i zakonshëm, saqë një vlerësim i bërë së voni nga një qendër analitike britanike llogarit se Kievi humb çdo muaj rreth 10.000 dronë.
Teksa dronët jo të kushtueshëm po bëhen më të avancuar, ata po integrohen gjithnjë e më shumë në strukturën e përgjithshme ushtarake në të dyja anët.
Dronët mund të operojnë në mjedise me rrezik të lartë dhe të kryejnë misione që do të ishin shumë të rrezikshme apo të vështira për forcat tokësore apo aeroplanët me pilotë. Sensorët dhe kamerat e avancuara, po ashtu, u mundësojnë dronëve të operojnë gjatë natës. Megjithatë, aftësia e tyre për të fluturuar në mot me shi, borë dhe mjegull është ende problem.
Videot që shfaqin operatorët ukrainas të dronëve duke hedhur granata mbi ushtarët rusë apo edhe mbi automjetet e tyre të blinduara kanë qarkulluar me të madhe në rrjetet sociale.
Teksa dronët e vegjël dhe ekonomikë mundësojnë kursime të konsiderueshme krahasuar me mjetet tradicionale ushtarake, përdorimi i këtyre dronëve pritet të evoluojë, teksa ata po luajnë një rol gjithnjë e më të rëndësishëm në luftën moderne.
