Thirrjet për shtensionim të situatës në veri të Kosovës vazhdojnë të mbesin kryelajm, derisa këto zhvillimet kanë nxitur idenë e një konference ndërkombëtare për Kosovën. Kjo ide fillimisht u dha nga kryeministri shqiptar, Edi Rama, i cili edhe sot ka theksuar se duhet këmbëngulur për ta detyruar Serbinë që ta pranojë planin Franko-Gjerman.
“Ka në tryezë planin Franko-Gjerman të cilin është Kosova në radhë të parë dhe jemi ne shqiptarët të parët të interesuarit që duhet ta shtyjmë përpara drejt një fundi, duke këmbëngulur për tryezën, duke këmbëngulur për të shfrytëzuar këtë potencial të madh të Aleancës dhe bashkësisë Euroatlantike për ta detyruar Serbinë që ta pranojë planin franko-gjerman”, ka thënë Rama.
Kjo ide e Ramës, sipas disa analistëve, do të ishte e mirëseardhur për Kosovën, e do të përmbyllte një dialog disavjeçar.
“Është krejtësisht e logjikshme që fundi i një projekti kaq të madh, siç është dialogu, të jetë një konferencë e madhe, historike ku do të legjitimohej gjithë ajo çka është arritur deri më tani, dhe të krijoheshin orientimet për të ardhmen, pra do të përmbyllej kapitulli shekullor historik mes Kosovës dhe Serbisë”, deklaroi analisti Artan Muhaxhiri.
Parakushtet kryesore, sipas tij, janë garancitë që palët duhet t’i ofrojnë ndaj organizatorëve “sepse nevojiten shumë investime, shumë logjistikë, shumë punë paraprakisht në mënyrë që të krijohet një konferencë e tillë”.
Edhe Arta Tahiri-Beqa tha se një konferencë për të mbledhur ide dhe për të diskutuar se si mund të dilet nga kjo krizë, nuk është rrezikshme.
“Mund të mendohet se cila do të jetë zgjidhja së paku afatshkurtër apo edhe afatmesme për të dal nga situata në të cilën Kosova dhe Serbia janë momentalisht”, deklaroi ajo.
Ndërkohë, kundër kësaj ideje është shprehur Partia Socialdemokrate.
“Sa i përket konferencës ne jemi kundër, për shumë arsye…çfarëdo tendenca që kryeministri Kurti të mbetet në pushtet, është në dëm të Kosovës sepse paraqitja e Kurtit në këtë konferencë nënkupton shpëtimin e tij në pushtet”, deklaroi Nushi.
Sa i përket propozimit të Ramës, kryeministri Kurti ka thënë se Kosova edhe më parë ka pasur konferenca ndërkombëtare, por ajo që duhet bërë është implementimi pa kushte i marrëveshjeve bazike të arritura mes palëve.
