Të shtunën në mbrëmje, gjashtë automjete u përplasën në mes vete qe ishin pjese e eskortes se nje dasme martesore në autostradën A1 pranë Wuppertal (Gjermani). Disa persona kanë mbetur të plagosur, mes tyre edhe tre fëmijë.
Përplasja ndodhi rreth orës 19:30 mes nyjeve të trafikut Wuppertal-Nord dhe Wuppertal-Langerfeld. Sipas policisë, makina e parë e kortezhit të dasmave ka frenuar papritur në zonën e kantierit, ku shpejtësia e lejuar është 80 km/h, për arsye ende të paqarta.
Drejtuesit që lëviznin pas tij e kanë njohur shumë vonë situatën e rrezikshme dhe ka ndodhur një përplasje masive. Ekipet e shpëtimit kanë ofruar ndihmë për 15 persona në vendngjarje.
Tetë persona, përfshirë tre fëmijë, u dërguan në spital.
Nga gjashtë automjetet e përfshira në aksident, pesë nuk ishin më të përshtatshme për qarkullim dhe duhej të largoheshin nga autostrada.
Zjarrfikësit kanë mbledhur karburantin e derdhur dhe kanë pastruar rrugën.
Autostrada në drejtim të Kolnit fillimisht u bllokua plotësisht menjëherë pas aksidentit. Njëra korsi u rihap më vonë. Megjithatë, ka pasur një vonesë të gjatë, sipas “Fenix”.
Policia ka nisur hetimet për zbardhjen e shkaqeve të aksidentit.
