Armatosja e FSK mbetet prioritet për çdo qeveri të vendit. Megjithatë ajo duhet të jetë një sekret i vendit. Kështu konsiderojnë ushtarak dhe analist të sigurisë së vendit.
Gjatë ditës së sotme përmes rrjetit social kreu i qeverisë Albin Kurti i shoqëruar nga ministri i mbrojtjes Armend Meha dhe Komandantin e FSK-së gjenerallejtënant Bashkim Jashari kanë prezantuar dronët Bajraktar.
Vetë ministri, ka thënë se dronët Bayraktar është lloji më i fundit i armatimit që kanë blerë.
Kryeministri Kurti tha se arsenalit të ushtrisë i kanë shtuar edhe dronë Bayraktar TB-2 të cilët i kemi blerë si Qeveri nga Turqia.
“Në dy vjet qeverisje e kemi shtuar për mbi 80% numrin e ushtarëve dhe mbi 100% buxhetin për ushtrinë. Kosova tash është edhe më e sigurt përveçse gjithnjë krenare”, ka pohuar Kurti.
Megjithatë ushtarak dhe njohës të sigurisë thonë se në raste specifike mund të prezantohet ndonjë lloj i armatimit, por jo shumësia. Kosova ka ligjin për klasifikimin e informacioneve, ku parashihen edhe nivelet e fshehtësisë.
Kolonel Kemail Shaqiri, thotë se vetëm në raste specifike mund të prezantohet ndonjë lloj armatimi me lejen e organeve kompetente, ndonjë trajnim specifik që duhet ndonjë ekzemplar.
“Por, jo shumësia, përndryshe në asnjë formë sepse këto janë gjëra sensitive dhe konfidenciale për aq sa mundet të mbahet konfidenciale, pasi që në ndërkohe vetvetiu do dihet në bazë të numrit të ushtarëve, pra strukturës, por armatimi duhet të jetë shumë herë në numër ma i madh se sa efektivat e mos të flasim për pjesët rezervë si në armatim, si në ushqim, njashtu edhe në pasojë tjera që janë të shumta e të domosdoshme. Hulumtuesit ushtarak dhe analistët i dinë të “gjitha” llojet, por asnjëherë sasinë e armatimit”, tha ai.
Edhe për Remzi Mehmeti, ushtarak, nuk është problem reklamimi, por sfidë është ruajtja e sekretit, për shkak të funksionimit të shumë strukturave inteligjente.
“Pse e pranon se ka dron nuk është problem, por duhet pasur shumë kujdes te numrat, sasia, vendruajtja, kalibri e shumë sende tjera që nuk guxojnë me u bë publike”, tha Mehmeti.
Sipas tij, është shumë problem me ruajt sekretin këtu te ne, për shkak të veprimit të shumë strukturave të inteligjencës.
Ndërsa Fadil Kajtazi, njohës i çështjeve të sigurisë tha se fshehtësia nënkupton sasinë, por jo llojin e armatimit.
“Po, ekspozohet, lloji, vetitë teknike – taktike, por jo domosdoshmërish sasia. Sipas dokumentit, një dokumenti të miratuar nga OSBE, (1992-1999), të gjitha shtetet anëtarë të OSBE, janë të obliguara të njoftojnë për armët, numrin e ushtarëve, stërvitjet, si dhe çdo shtet ka të drejtë të vizitoi bazat për të cilat kanë interesim në shtetet e caktuara”, tha ai.
Kosova ka një ligj për privatësinë e të dhënave që është pak a shumë në përputhje me standardet evropiane, por zbatimi i tij është ende i mjerueshëm.
Në lidhje me lirinë e qasjes në informacione me rëndësi publike, fshehtësia është ende ndër arsyet më të zakonshme për refuzimin e aksesit.
