Nga sot do të fillon zvogëlimi i pranisë së Policisë së Kosovës edhe për 25 për qind në dhe rreth objekteve komunale në veri të Kosovës.
Kjo ka ardhur pas një vlerësimi të përbashkët nga Policia e Kosovës, EULEX-i dhe KFOR-i. Përmes një komunikate për media bëhet e ditur se nga ky takim i mbajtur është vlerësuar se situata në veri është e mirë.
Policia e Kosovës ka bërë të ditur se në vazhdën e realizmit të detyrave dhe autorizimeve të saja kushtetuese dhe ligjore në interes të sigurisë publike në vend, si dhe me qëllim të zbatimit të dakordimeve të arritura në Bratisllavë me 10 korrik 2023, në mes të Bashkimit Evropian dhe Republikës së Kosovës, saktësisht hapit dy të këtij dakordimi, me këtë rast është mbajtur takimi punues mes Policisë së Kosovës, EULEX dhe KFOR për vlerësim të situatës së sigurisë, në dhe përreth ndërtesave komunale të komunave veriore, raporton RTKlive.
“Sipas vlerësimit të përbashkët, nga Policia e Kosovës, EULEX dhe KFOR, situata e sigurisë në dhe rreth objekteve të komunave veriore vlerësohet se është e mirë. Në kuptim të këtij konstatimi të përbashkët, nga a premtja fillon zvogëlimi i pjesëtarëve të Policisë së Kosovës për 25%, në dhe përreth objekteve komunale në veri”, thuhet në njoftim.
Sipas njoftimit, ekipet e Policisë së Kosovës bashkë me EULEX dhe KFOR, do të vijojnë koordinimin dhe do të ndërmarrin veprimet e nevojshme sipas vlerësimit të rregullt të situatës së sigurisë në dhe përreth objekteve komunale, në komunat veriore të Republikës se Kosovës.
Për zvogëlimin e pranisë së Policisë së Kosovës edhe për 25 për qind në dhe rreth objekteve komunale në veri të Kosovës, ka pasur reagime të ndryshme.
Zëvendëskryeministri i Kosovës, Besnik Bislimi, ka shkruar në “Twitter” se Kosova po bën hapat e mëtutjeshëm për implementimin e Marrëveshjes së Bratisllavës.
“Pas Marrëveshjes së Bratisllavës, ka një proces të besueshëm drejt de-përshkallëzimit. Situata është e qetë tash e disa javë – e konfirmuan dje bashkërisht Policia e Kosovës, KFOR-i dhe EULEX-i. Kosova po respekton plotësisht angazhimet e saj dhe beson se pala tjetër do të bëjë të njëjtën gjë”, ka shkruar Bislimi.
Tutje ai ka përmendur çështjen e reduktimit të trupave të Policisë së Kosovës në veri të vendit. “Marrëveshja e 10 korrikut është ndërmjet BE-së dhe Kosovës dhe ka për qëllim të zbatojë deklaratën e BE27 nga 3 qershori. Masat e BE-së kundër Republikës së Kosovës deklarohen të përkohshme, të kthyeshme dhe në varësi të një përkushtimi të besueshëm për deeskalim”, ka shkruar ai.
Edhe i dërguari i Bashkimit Evropian për dialogun mes Kosovës dhe Serbisë, Miroslav Lajçak, e ka mirëpritur vlerësimin e përbashkët mes Policisë së Kosovës, EULEX-it dhe NATO-s për situatën në veri. Lajçak tutje ka thënë se ky vlerësim është në përputhje me dakordimin në Bratislavëm mes tij dhe zëvendëskryeministrit Besnik Bislimi.
“Ky është një hap i rëndësishëm drejt deeskalimit të plotë të tensioneve në veri të Kosovës”, ka shkruar Lajçak në “Twitter”.
Edhe ministri i Punëve të Brendshme, Xhelal Sveçla, është deklaruar lidhur me mbajtjen e zotimeve të marrëveshjes së Bratisllavës, drejt shpërshkallëzimit të situatës në veri të vendit.
Sveçla ka thënë se konkluzioni i organeve të sigurisë, Policisë së Kosovës, EULEX-it e KFOR-it është se situata në veri është e qetë.
“Policia e Kosovës ka mbajtur një takim me EULEX-in dhe KFOR-in, siç është paraparë me pikën 2 të marrëveshjes së Bratisllavës. Konkluzioni i vlerësimit të përbashkët të sigurisë është se situata është e qetë. Nga e premtja do të ulim prezencën e policisë edhe me 25% brenda dhe përreth ndërtesave komunale. Kosova po zbaton zotimet nga marrëveshja e Bratisllavës dhe po vazhdon të kontribuojë pozitivisht në de-eskalimin” ka thënë Sveçla në “Twitter”.
Një nga hapat tjera të marrëveshjes është edhe ulja e prezencës së trupave të Policisë së Kosovës, e që të premten do të ndodhë reduktimi prej 25%.
