Kryeministri Albin Kurti kërkon që masat e vendosura nga Bashkimi Evropian ndaj Kosovës të hiqen sa më shpejt, pasi qeveria e Kosovës ka qenë e përkushtuar në dialog dhe në depërshkallëzim të situatës në veri. Këto deklarata Kurti i bëri për mediet në Maqedoninë e Veriut, pas vizitës që i bëri të premten Shkupit dhe Tetovës.
“…besoj se duhet të hiqen sa më parë sepse Kosova është konstruktive, qeveria e Kosovës ka qenë kreative me ide dhe të përkushtuar në dialog, që ka rezultuar me marrëveshjen bazike. Me 27 shkurt ne në Bruksel e kemi realizuar marrëveshjen bazike, që është njohje reciproke de facto. Në marrëveshjen e Ohrit ia bashkëngjitëm edhe një aneks implementimi me 12 pika, por është Beogradi që e ka shkelur këtë”, ka theksuar Kurti për “TV Koha”.
Kryeministri tha se kundërshtimet për marrëveshjet nuk vinë nga Kosova, por nga Serbia. Edhe depërshkallëzimi në veri, sipas tij, tashmë ka ndodhur në masë të konsiderueshme.
Kryeministri Kurti ka folur edhe për raportet e tij me kryeministrin e Shqipërisë, Edi Rama dhe liderin e shqiptarëve në Maqedoni, Ali Ahmeti.
“Ne kemi raporte korrekte, kemi raporte të mira, është çështje e përgjegjësive Kjo nuk do të thotë që nuk kritikohemi. Besoj që kritikat janë pjesë e demokracisë dhe ato duhet të jenë konstruktive”, tha Kurti, i cili edhe atje përmendi anulimin e mbledhjes së dy qeverive nga kryeministri Rama, duke e konsideruar si gabim nga ana e Tiranës.
“Është për të ardhur keq që më 14 qershor nuk u mbajt mbledhja e dy qeverive, që u përgatit muaj më parë, por anulimin e saj nuk e kemi bërë ne, përkundrazi ne i kemi bërë të gjitha përgatitjet. Është mirë që të mos pritet mbledhja e ardhshme që të nënshkruhen ato marrëveshje, që më në fund u bë nga Tirana zyrtare përveçse nga Prishtina”, tha Kurti.
Kurti tha se ka kontakte të mira edhe me krerët e partive të tjera politike shqiptare dhe maqedonase. Ndërsa ka thënë se vizita e tij në Shkup dhe Tetovë nuk është partiake, është kombëtare për të mirën e dy shteteve.
“Edhe me LSDMN-në kemi kontakte në forume të ndryshme ndërkombëtare, por edhe të drejtpërdrejta për shkak se edhe ata janë në mesin e këtyre partive socialdemokrate. Kështu që kjo vizitë nuk është partiake, është kombëtare është për të mirën e të dy shteteve tona, është për të mirën e qytetarëve në të dy anët e kufirit”, tha Kurti.
