Me pjesëmarrje të një numri të madh të poetëve dhe shkrimtarëve nga Shqipëria, Mërgata e Kosova, sot në restorant “Guri i Plakës”, u mbajt Edicioni i VII i manifestimit letrar “Festivali i poezisë Guri i Plakës”.
Me këtë rast me një fjalë hyrëse të pranishmit i përshëndeti, Iizet Abdyli, kryetar i Art Club “Rifat Kukaj”, i cili foli për rëndësinë e këtij manifestimi i cili u dedikohet krijuesve nga mërgata. Pastaj përshëndeti edhe Hysen Ibrahimi kryetar i Shoqatës së Shkrimtarëve shqiptarë në Suedi, “Papa Klementi XI Albani”, i cili vlerësoi lart bashkëpunimin në mes të dy asociacioneve.
Manifestimi filloj me përurimin e librave: “Thesari Kombëtar 13-14” dhe “Jubileum”, botime nga Shoqata e Shkrimtarëve “Papa Klementi XI Albani”, Suedi, për të cilat folën Muhamet Ibrahimi dhe Izet Abdyli. Më pastaj u lexua letra përshëndetëse e shkrimtarit Selman Dervishi nga ShBA dhe u vazhdua me Orën poetike “Guri i Plakës”, me karakter garues ku ishin pjesëmarrës 44 konkurrues, me ç’rast juria në përbërje: Xheladin Mjeku, Nexhat Rexha dhe Dibran Demaku, pas vlerësimit të poezive, ndanë tri çmime.
Vendi parë i takoi poezisë “Xhubleta” me autor Ramë Oracën me shifrën “Ago imeri”, vendi dytë poezisë “Përvjetor pa puthje”, me autor Kadri Tarelli, shifra “101” dhe vendi i tretë poezisë “Retrospektivë në kujtime” me autore Naxhije Doçi, me shifrën “Qëndresë”. Ndërkaq çmimi special “Krijuesi i diasporës”, iu nda Xhevat Muçakut e për të cilin arsyetimin e paraqiti poeti Adem Gashi.
Ky manifestim u pasurua edhe me pika muzikore nga Grupi i pavarur artistik “Drenica”, që jeton dhe vepron në Itali si dhe me ekspozitën e artit figurativ të piktorit Rexhep Kahrimani.
Ky manifestim edhe pse nuk kishte mbështetje financiare institucionale, u mbështet materialisht nga donatoret si: Poliklinika stomatologjike “Dobruna”, restorant “N’ Hije”, laboratori “Dina”, “Lider market”, “Jora center” dhe “Shqipdoni sh.p.k”, për çka Art Club “Rifat Kukaj”, iu shpreh falënderim. /Kosovatimes/
