Presidentja e vendit, Vjosa Osmani i ka vlerësuar edhe një herë të padrejta masat që Bashkimi Evropian i ka vendosur ndaj Kosovës, derisa ka thënë se pret që partnerët e BE-së të bëjnë tërheqjen e këtyre masave, pasi institucionet janë duke e respektuar marrëveshjen e arritur në Bratislavë për deeskalim të situatës në veri.
“Kosova është duke e respektuar me besnikëri atë marrëveshje. Tashmë ka reduktim të forcave policore në përputhje me marrëveshjen, e që kërkon konsultim edhe me EULEX-in edhe me misionin e NATO-s këtu. Është duke u krijuar baza ligjore për zgjedhje të jashtëzakonshme në këto komuna veriore. Të gjitha këto kanë qenë pjesë e marrëveshjes së Bratislavës. Tani presim që hapat t’i marrin partnerët tanë në Bashkimin Evropian sepse masat e tyre kanë qenë komplet disproporcionale me çfarëdo pakënaqësie që mund të kenë pasur në raport me veprimet e Qeverisë së Kosovës”, ka theksuar presidentja Osmani në konferencë për media gjatë vizitës në Dragash.
Ajo ka thënë se shpesh e ka përshtypjen se shumë shtete e kanë trajtuar Kosovën sikurse ta pushtonte dikë.
“Kosova nuk e ka pushtuar asnjë territor të shtetit fqinj, Kosova ka vepruar në territorin e Republikës së saj, Republikë sovrane e cila është njohur nga shumica dërrmuese e shteteve të Bashkimit Evropian. Si presidente e vendit natyrisht kërkoj çdo ditë të ketë koordinim me aleatët dhe partnerët tanë sepse çështjet e sigurisë janë tema kolektive dhe jo individuale”, ka shtuar Osmani.
Presidentja më tej tha se Kosova ka nevojë për përkrahjen e partnerëve në mënyrë që çdo veprim i policisë dhe institucioneve ta ketë përkrahjen e nevojshme edhe nga aspekti i sigurisë, por theksoi se pavarësisht asaj që ka ndodhur më 26 maj, vlerëson se përgjigjja e BE-së ka qenë komplet disproporcionale me veprimet e institucioneve të Kosovës.
“Nuk është përgjigje që e nxit bashkëpunimin dhe koordinimin, përkundrazi është përgjigje që më së shumti i bën dëm procesit të dialogut dhe e vendos atë në një rrafsh komplet jashtë binarëve në të cilët do të duhej të ishte, e ku të dyja palët do të duhej të trajtoheshin në mënyrë të barabartë. Llogariteni, Serbia ka pasur njerëz të saj që kanë sulmuar ushtarët e NATO-s dhe për këta njerëz ka dëshmi të sakta dhe dihet kush janë, disa prej tyre janë policë të Serbisë dhe nuk ka asnjë masë të vetme në raport me Serbinë për këtë agresion që ka kryer në raporton me Kosovën dhe për këtë dhunë që ka kryer në raport me NATO-n”, ka nënvizuar Osmani.
Presidentja tutje tha se ky nuk është vetëm një test sa i përket sundimit të ligjit për institucionet e Kosovës, por edhe test ndaj Bashkësisë Ndërkombëtare se a do ta tolerojnë apo jo dhunën ndaj NATO-s, e cila është bërë me urdhër të Serbisë.
Osmani: Faktori ndërkombëtar t’i bëjë presion Vuçiqit
Presidentja e vendit Vjosa Osmani ka kërkuar nga komuniteti ndërkombëtar që të bëjë presion mbi presidentin e Serbisë, Aleksandar Vuçiq për t’i dhënë fund ndikimit negativ ndaj qytetarëve serbë në veri të Kosovës.
E para e shtetit ka thënë se është çështje ditësh kur do të përfundojë baza ligjore sa i përket afateve dhe procedurave lidhur me shpalljen e zgjedhjeve të parakohshme në katër komunat në veri.
“Pasi të përfundojë kjo i takon pastaj qytetarëve në veri nëse do ta shfrytëzojnë këtë të drejtë apo jo. Është esenciale që komuniteti ndërkombëtar të kërkoj nga Vuçiqi që të ndërpresë ndikimin negativ, frikësimin e qytetarëve dhe dhunën që përdoret nëpërmjet strukturave ilegale ndaj qytetarëve në veri dhe t’i lejojë ata të shfrytëzojnë të drejtat e tyre që garantohen edhe me kushtetutë edhe me ligj”, ka thënë Osmani në konferencë për media në Dragash, Behxhet Xheladini.
Ajo tutje u shpreh e bindur se qytetarët serbë dëshirojnë ta shfrytëzojnë të drejtën që përmes peticionit të shpallen zgjedhjet e parakohshme. “Këtë bindje e kam nga komunikimet që i kemi çdo ditë. Ata dëshirojnë ta shfrytëzojnë këtë të drejtë në mënyrë që të kenë zgjedhje të jashtëzakonshme dhe t’i zgjedhin kryetarët e komunave që marrin votat e qytetarëve në zgjedhje të lira e demokratike. Por deri më tash nuk shoh ndonjë vullnet nga presidenti serb që ai të ndërpresë agresionin institucional që vazhdimisht e kryen në raport me fqinjët. Nuk shoh nga ai vullnet që të ndërpresë dhunën që përmes strukturave kriminale vazhdimisht e ushtron ndaj qytetarëve tanë në veri. Prandaj presioni duhet të jetë në Beograd, që më në fund Beogradi të fillojë të sillet në përputhje me standardet evropiane e jo si një shërbëtor besnik i Putinit dhe vetëm i Putinit”, ka shtuar presidentja Osmani.
Osmani për reagimet në Maqedoninë e Veriut pas vizitës së Kurtit: Keqkuptim i vogël që tejkalohet
Presidentja komentoi edhe vizitën e kryeministrit Kurti në Maqedoninë e Veriut, pasi u pyet nga gazetarët rreth reagimit të presidentit maqedonas Pendarovskit për këtë çështje. “Maqedonia e Veriut është një prej fqinjëve më të çmuar të Republikës së Kosovës, ndër shtetet që e ka pranuar pavarësinë e Kosovës në momentet më kritike, një ndër shtetet më të afërta edhe fizikisht. Komunikimet mes qytetarëve tanë dhe atyre nga Maqedonia e Veriut gjithnjë kanë qenë të shkëlqyeshme dhe këto relacione janë duke u avancuar qoftë në aspektin politik edhe në atë ekonomik. Tani në tubime askush nga organizatorët nuk e kontrollon çdo qytetar se çfarë ka në dorë, por natyrisht se nëse institucionet e atjeshme kanë ndonjë shqetësim, e vetmja kërkesë që ne kemi si institucione të Republikës së Kosovës është që gjithçka të bëhet në përputhje me standardet më të larta ndërkombëtare të mbrojtjes së njeriut dhe mbrojtjes së komuniteteve joshumicë, duke respektuar gjithnjë rolin shtetformues të komunitetit shqiptar dhe integrimin evropian të shtetit. Ka qenë një lëvizje e një qytetari dhe jo diçka e organizuar. Ky besoj që është një keqkuptim i vogël, por kur kemi vullnet të dyja palët, siç e kemi dëshmuar gjithnjë, tejkalohet. Institucionet e Kosovës janë të interesuara vetëm për relacione pozitive gjithnjë në rritje me Maqedoninë e Veriut ”, ka theksuar presidentja Osmani.
